Maksim SHackix: "Butun stadion sizga qarshi muxlislik qilsa ham, professional sifatida o'z o'yiningizni o'ynashingiz kerak"

O'yin haqida

- Barchaga xayrli kech. "Andijon" maydonida o'tadigan o'yinlar har doim oson bo'lmaydi. Sababi, jamoa muxlislari tomonidan juda kuchli tarzda qo'llab-quvvatlab boriladi. Bugun ham bizga oson bo'lgani yo'q, stadionga kelgan muxlislar bu uchrashuvni haqiqiy futbol bayramiga aylantirib yuborishdi. 

Superkubokda 3 kun oldin o'tkazgan og'ir o'yinimizdan so'ng "Andijon" bilan o'yinga tiklanib olishimiz uchun vaqtimiz qisqa bo'ldi. SHunga qaramay yigitlar yaxshi harakat qilishdi. Bugun juda og'ir o'yin o'tkazdik. Qo'lga kiritilgan 3 ochko juda qiyin tarzda amalga oshdi deb ayta olaman.

- Siz "Andijon" klubi fan klubiga qanday baho bergan bo'lardingiz? "Paxtakor" bugungi o'yinda muxlislar bosimini qanday engib o'tdi?

- Men aytib o'tdim, "Andijon" muxlislari jamoani jamoani juda kuchli qo'llab-quvvatlashadi. Bu jamoa fan klubi haqida bilaman. Biz buni avvaldan bilardik. Bu futbolning ajralmas qismi. Butun stadion sizga qarshi muxlislik qilsa ham siz professional sifatida o'z o'yiningizni o'ynashingiz kerak. "Andijon" stadionidagi sharoitlar barcha uchun qulay tarzda shakllantirilibdi. Aytaylik, bu stadionga oilaviy keldingiz, farzandlaringiz uchun park ham bor, bemalol hordiq chiqarib ketsangiz bo'ladi.

- "Paxtakor" klubida muxlislar bilan ishlash borasida qanday ishlar amalga oshirilayapti?

- Klubda muxlislar bilan ishlash borasida tizimli ishlar yo'lga qo'yilgan. "Paxtakor" qarorgohida har doim muxlislar bilan alohida yondashuv asosida ishlanadi. Masalan, klubning yubileyi, muhim sanalari doim muxlislar bilan hamfikr tarzda tashkil etiladi. Maydonga chiqsangiz, tribunada sizni olqishlayotgan muxlislar bo'lsa, bu zavqli albatta. Biz bu borada to'g'ri yo'ldamiz deb ayta olaman.

- "Paxtakor" mavsumni u qadar yorqin o'tkazmayapti. Hozirga kelib jamoa o'yinlari ijobiy tomonga o'zgardi. Mavsum boshidanoq shunaqa tempda o'ynash uchun jamoaga nima etishmadi?

- Biz mavsumni yomon boshlamadik. Tarkibimiz 90 foizga o'zgarib ketdi. Yoshlar bilan muntazam bir xil tempda o'ynash qiyin. Biz o'yinlar va mashg'ulotlar mobaynida shakllanib boramiz.