"Lokomotiv" bolalar kuniga bag'ishlangan xayriya-tadbirida ishtirok etdi (FOTO)

Mazkur xayriya-tadbirida bir qator sanatkorlar bilan birgada sportchilar ham ishtirok etishdi. Xususan oliy ligada chempionlik uchun kurashayotgan "Lokomotiv" PFK vakillari ham mazkur tadbirda qatnashib, bemor bolalar tezda sog'ayib ketishi uchun o'z hissalarini qo'shishdi.

Sayyod.com sayti tomonida tashkil etilgan bayram-tadbiri ko'tarinki ruhda kechdi. Tadbirda ishtirok etgan "Lokomotiv" PFK Bosh direktor o'rinbosari To'labek Akramov, futbolchilardan Temur Kapadze, Marat Bikmaev, Temurxo'ja Abduxoliqov, Ikrom Aliboev, Salim Mustafoev leykemiya bilan og'riyotgan bolalarga klub tomonidan tayyorlangan sovg'alarni topshirishdi. SHuningdek, jamoamiz sardori Temur Kapadze say-harakatlari bilan bemor bolalarga ketadigan dori-darmon uchun jamoamiz futbolchilari malum miqdorda pul yig'ib berishdi.

Umuman olganda, bayram yaxshi o'tdi. Bunda elimiz suygan sanatkorlardan Nasiba Abdullaeva, Ozoda Nursaidova, Munisa Rizaeva, Feruza Jumaniyozova va boshqalar o'z qo'shiqlari bilan bolakaylarga quvonch ulashishdi. Futbolchilarning davraga chiqishishi esa bayramga yanada ko'rk bag'ishladi. championat.asia sayti rahbari Nodirxo'ja Yuldashev o'ziga xos konkurs o'tkazib, futbol mavzusi bo'yicha bir qator qiziqarli savollar bilan bolalarga murojaat qildi. Savollarga javob topgan yosh bolakaylar esdalik sovg'alari bilan taqdirlandi.

Tadbirda shuningdek, "Paxtakor", "Bunyodkor", "Nasaf", "Olmaliq", "Qo'qon-1912" vakillari ham ishtirok etib, shifoxonada yotgan bemorlarning ko'nglini ko'tarishdi. Bugungi tadbirdan ham bolakaylar, ham ularning ota-onalari, ham futbolchi va shou-biznes vakillari katta zavq olishdi. Biz esa o'z navbatida mana shu kabi savob ishlarga bosh-qosh bo'layotgan Sayyod.com va championat.asia sayti xodimlariga minnatdorchilik bildirib qolamiz.

"Lokomotiv" PFK matbuot xizmati.