“Lokomotiv-99” - Buxorodagi turnir g'olibi

Ushbu musobaqa 1999 yilda tug'ilgan futbolchilar o'rtasida bo'lib o'tdi. Jami 16ta jamoa ishtirok etgan turnirda “Lokomotiv” futbol maktabi tarbiyalanuvchilari g'oliblikni qo'lga kiritishdi.

“Lokomotiv-99” o'z guruhida Vobkent, Urganch va Buxoro jamoalariga qarshi bahs olib borib, guruhda birinchi o'rinni egalladi.
1-tur. “Lokmotiv-99” – Vobkent - 3:0
2-tur. “Lokomotiv-99” – Urganch - 2:1
3-tur. “Lokomotiv” - “Buxoro” - 0:0

Keyingi bosqichda “SHo'rtan” tarbiyalanuvchilari 2:1 hisobida mag'lub etilgan bo'lsa, yarim finalda Navoiyning “Uchquduq” jamoasi 3:1 hisobida dog'da qoldirildi. Musobaqaning hal qiluvchi finali “Lokomotiv-99” va “Buxoro” futbol maktabi o'rtasida bo'lib o'tdi va o'yinda hisob ochilmadi. Penaltilar seriyasida esa omad yosh “temiryo'lchilar”ga kulib boqdi - 4:1.

Turnir haqida “Lokomotiv-99” bosh murabbiyi Rinat Miftaxutdinov quyidagi fikrlarni aytib o'tdi:
“Bizni yaxshi kutib olishdi va tashkilotchilik ham joyida bo'ldi. O'yinlar uchta stadionda o'tkazildi. Final bahsi “Yoshlik” stadionida bo'lib o'tdi. Albatta, birinchi o'rinni olganimizdan xursandmiz. Bu bizning birinchi bor chetga chiqishimiz bo'ldi, shu bois futbolchilar boshqacha taassurot bilan qaytishdi. Bo'sh kunimizda Buxoroning tarixiy obidalarini aylandik, bu ham futbolchilarga maqul keldi”.

Ushbu turnirning bosh tashkilotchisi Buxoro viloyat futbol federaciyasi hamda “Buxoro” futbol klubi bo'ldi. Turnir yakunida odatdagidek g'olib va sovrindorlarni taqdirlash marosimi o'tkazildi.

“Yarim himoyachimiz Azizov Sulton musobaqaning “Eng yaxshi yarim himoyachisi” deb topildi, - deydi Rinat Miftaxutdinov. - SHogirdlarimdan shuningdek darvozabon Vagin Vladimir, himoyachi Rahimov Mamurjon hamda hujumchi Karpenko Maksimning (Viktor Karpenkoning o'g'li) harakatlari ham menga maqul keldi. Biz bilan delegaciya rahbari bo'lib futbol maktabimiz direktori Erkin Saidov bordi. SHu o'rinda musobaqa tashkilotchilariga, jumladan “Buxoro” futbol maktabi rahbari Jamshid aka Botirovga katta rahmat aytmoqchiman”.