Levan Arveladze: "Pro liga kuchsiz ko'ringani yo'q, bu ligada ham ko'tarilish, pasayish davri bo'ldi"

- Ilk navbatda, yakunlangan mavsum haqida fikr bildirsangiz...

- Yo'l oson o'tmadi. Menda O'zbekiston Superligasi tajribasi bo'lgani uchun aytaman, Pro liga kuchsiz ko'ringani yo'q, bu ligada ham ko'tarilish, pasayish davri bo'ldi. Yakunda biz vazifani bajardik va kubokni ko'tardik.

- Jamoalar soni kam bo'lgani uchun o'yinlar ham kamroq bo'ldi. Uchrashuvlar sonining kamligi sababli o'rtada dam kunlari ko'p bo'lgani futbolchilarga qiyinchilik tug'dirmadimi?

- Ha, bu ham o'ziga yarasha qiyinchiliklar tug'dirdi. Har bir o'yinga tayyorlanish uchun deyarli bir yig'in tashkil qilinayotgandek edi. Bunda biz katta yuklama olardik va rasmiy o'yinlarni sog'inardik. Bu esa futbolchini ham ruhan, ham jismonan charchatardi.

- Ushbu mavsumda raqiblardan nimalarni kutgandingiz?

- Umuman olganda, oson raqib bo'lmasligi aniq edi. Albatta, bu Superliga emasligini bilardim, lekin g'alabalar osonlikcha qo'lga kiritilmasligini tushunaman.

- Biz "FarDU"ga qarshi o'yindayoq masalani hal qilishimiz va intrigani so'nggi turgacha qoldirmasligimiz mumkin edi. O'sha bahsda nimalar bo'lib ketdi?

- O'zimizga ishonch bilan o'ynayotgandik, bahsni biz nazorat qilib turgandik. Lekin o'shanda ikki jarimadan uzatilgan to'plar barchasini o'zgartirib yubordi. Nimalar bo'lsa bo'ldi, bu futbolning ajralmas qismi. Yakunda biz champion sifatida Superligaga qaytdik.

- Yangi mavsumdan nimalar kutyapsiz?

- O'zbekistondagi uchinchi mavsumim ham sermahsul o'tdi: ikkita sovrin ko'tardim (kuladi). Ko'ramiz, keyingi mavsum qaerda bo'lsam ham bor kuchim bilan o'ynashga, yanada sermahsul bo'lishga, yana bir sovrin ko'tarishga harakat qilaman. Shuningdek, "Lokomotiv" muxlislarini o'tgan mavsum bilan tabriklayman!