Katanecning shtabida Kapadzeni ham ko'ramizmi?

Uning shtabida Timur Kapadzeni ko'rishni istayotganlar ham talaygina. SHu tufayli "Olimpik"ni boshqarayotgan 39 yoshli mutaxassis bilan bog'lanib, bazi savollarimizga javob oldik. 

— Piter Xyuistra "Olimpik" sardori Behzod SHamsiev qishda "Paxtakor"ga qaytarilishiga shama qilgandek bo'ldi. Sizning Behzod bilan bog'liq rejalaringiz qanday?

— Agar taklif bo'lsa, mavsum oxirida gaplashib ko'ramiz. Bizning asosiy vazifamiz yigitlarni yaxshi darajaga olib chiqish. Futbolchi yanada o'sishi uchun qulay joy bo'lsa, nega yo'q deyishimiz kerak. Quvonarli jihati, 5-6 oy ichida shogirdlarim ancha o'sib, ko'pchiligi Superliga jamoalarining qiziqish doirasiga tushyapti. Albatta, yigitlar o'z mehnat va harakatlari bilan ko'pchilikning nazarini o'zlariga qaratishyapti. Agar futbolchilarning maqsadi yuqori bo'lsa, bundan ham kuchliroq bo'lishlari kerak.

— Muxlislarga "Olimpik" ko'rsatayotgan o'yin yoqyapti. Ko'pchilik jamoani Superligada ko'rishni istab qoldi. Agar yuqori divizionga yo'llanma olishni uddalasangiz, Superligada tajriba to'plashga ulgurgan olimpiya terma jamoasi yoshidagi futbolchilar klubga olib kelinadimi? Harholda Jasur Jaloliddinov, Hojimat Erkinov singari o'yinchilar talaygina.

— Superligaga yo'llanma ola bilsak, o'shanda o'ylab ko'ramiz.

— "Olimpik" loyihasi o'zini oqlayaptimi?

— Albatta, oqlayapti. Bu loyiha nega kerak edi? Olimpiya va milliy terma jamoaga nomzodlar sonini ko'paytirish, ularning kuchayishi va rivojlanishi uchun. Ko'rganingizdek, yigitlar qisqa muddat ichida ancha o'sishga erishdi. Kuchli futbolchilar soni qancha ko'paysa, bundan faqat terma jamoa yutadi. SHu tufayli barcha imkoniyatlarni yaratib bergan O'FA va MOQ rahbariyatiga minnatdorchilik bildiraman.

— "Olimpik" kubokning chorak finalida "Paxtakor" bilan to'qnash keladi. Ko'plab muxlislar Kapadze jamoasidan g'alaba kutyapti...

— "Paxtakor" O'zbekistonning eng yaxshi jamoalaridan biri. Ular bilan to'qnashish biz uchun foydali bo'ladi. CHunki kuchli raqibga qarshi o'yinda kamchiliklarimizni ko'rib, futbolchilarni tekshirib olish imkoniyati bor. Tarkibimizdagi aksar futbolchilar "Paxtakor" akademiyasida tarbiyalanishgan. Bu o'yin ular uchun yaxshi imkoniyat. "Paxtakor"ga qarshi imkon qadar yaxshi tayyorlanib, eng yaxshi o'yinimizni ko'rsatamiz.

— Milliy terma jamoa boshqaruvi Srechko Katanecga topshirilyapti. Uning shtabida Kapadzeni ham ko'ramizmi?

— Xorijlik murabbiy bo'lgani uchun unga mahalliy mutaxassislardan kimdir ko'maklashishi kerak. Bu vazifaga Ravshan aka Haydarov munosib edi.

Menga kelsak, imkoniyat va bo'sh vaqtim bo'lsa, albatta, borib ish jarayoni bilan tanishaman. Kerakli narsalarni o'rganib, o'zim uchun olaman. CHunki menga ham Katanecning ish uslubi juda qiziq!

Faxriddin Ro'ziev suhbatlashdi