“Istiqlol” sobiq futbolchilariga yangi klub safida maydonga tushish uchun ruxsat beriladi

“Istiqlol” klubining kutilmaganda musobaqadan chiqib ketishi oqibatida bir qator futbolchilar o'yin amaliyotsiz qolishi mumkin edi. Mazkur holat futbolchilar hamda boshqa tashkilotlarga bog'liq bo'lmagan jarayon ekani, futbolchilar oylik-maosh masalasida shundoq ham murakkab vaziyatda qolayotgani, qolaversa, musobaqalarda hal qiluvchi palla hali boshlanmaganini inobatga olib, “Istiqlol” sobiq futbolchilarining yangi shartnomalarini ro'yxatdan o'tkazish va ularga licenziya taqdim etish taklifi ko'pchilik ovoz bilan maqullandi.

Bunda bir jihatga etibor qaratish zarur. “Futbolchilar maqomi va transferi bo'yicha reglament”ning 5.3-bandiga ko'ra, futbolchi bir mavsum davomida ko'pi bilan uch klub safida ro'yxatdan o'tishi mumkin ekani va shularning faqat 2 tasida rasmiy o'yinlarda ishtirok etishi mumkinligi belgilab qo'yilgan. SHundan kelib chiqib, “Istiqlol” futbolchilari Superliga yoki Pro liga klublari bilan shartnoma tuzsa va eng kamida uchrashuv qaydnomasiga kiritilsa, ular yil yakuniga qadar boshqa klub safiga qo'shila olmaydi. Agar “Istiqlol” futbolchilari Birinchi liga klubi safiga borib qo'shilsa, u holda futbolchilarda 5-31 iyul oralig'ida boshqa klub bilan qo'shimcha shartnoma imzolash imkoniyati bo'ladi. Bunda Birinchi liga klubi mazkur davr davomida futbolchi bilan tuzilgan mehnat shartnomasini bekor qilishga rozi bo'lishi darkor. Boisi, ayni vaqtda har qanday shartnoma yil yakuniga qadar tuzilishi shart. Birinchi liga klublarining yarim professional maqomda ekani, Superliga va Pro liga klublarining esa professional maqomda ekanidan kelib chiqib, shunday qaror qabul qilindi.