Husniddin Nishonov: "Jahon chempionatiga chiqishga harakat qilamiz"

Bahodir Ahmedov boshchiligidagi O'zbekiston terma jamoasi guruhda Afg'oniston, Tojikiston va Nepal bilan kurash olib bordi.

Uchala bahsda ham g'alabaga erishgan futzalchilarimiz 2020 yilning 24 fevralidan 10 martiga qadar Turkmaniston poytaxti Ashxabod shahrida bo'lib o'tadigan futzal bo'yicha Osiyo chempionatining final bosqichiga chiqishdi. Ushbu Osiyo chempionatida eng yaxshi natijaga erishgan 5ta jamoa futzal bo'yicha Jahon chempionatiga yo'llanmani qo'lga kiritishadi.

Biz Erondagi saralash bahslaridan so'ng terma jamoamiz azolari Husniddin Nishonov bilan suhbatlashdik.

- Saralashdagi uchala o'yinga alohida to'xtalib o'tsangiz...
- 2017 yil Ashxobodda o'tgan Yopiq inshootlardagi Osiyo o'yinlarida Afg'oniston bilan to'qnash kelganmiz va o'shanda yutqazib qo'ygandik. Ana o'sha mag'lubiyat uchun revansh olishimiz shart edi. Bugungi kunda ularda ham, bizda ham tarkib anchagina yoshargan. Guruhimizda eng asosiy raqib aynan Afg'oniston edi. Dastlabki uchrashuvda g'alaba qozona oldik va bu bizga qo'shimcha kuch bag'ishladi.

Nepal bilan ochig'ini aytsam o'yinimiz qovushmadi. To'g'ri g'alaba qozondik, ammo yaxshi o'ynay olmadik. Bahsdan so'ng murabbiylar tanbeh berishdi, xatolarimizni ko'rsatib berishdi. Nepal bilan adashmasam ilk bor o'ynadik. O'ziga yarasha kuchli, yaxshi jamoa ekan.

Ikkala jamoa ham so'nggi turdan oldin yo'llanmaga ega bo'lgani uchun Tojikiston bilan uchrashuv qiziqarli o'tdi. Tezkor gollar o'tkazib yubordik. Murabbiylarimiz taym-aut olishdi va tezda o'zimizga kelib oldik. Vaziyatlardan foydalanib yirik hisobda g'alaba qozona oldik. Tojikistonga hozir yangi murabbiy kelgan va jamoa o'yinida o'zgarish bor. Murabbiylar saralash bahslarida uchala uchrashuvda ham g'alaba qozonish vazifasini qo'yishgandi. Xudoga shukur bu vazifani uddaladik.

- Keyingi yilgi Osiyo chempionatidan nimalar kutayapsiz? Musobaqa Turkmanistonda o'tadi va unda Jahon chempionati yo'llanmalari o'ynaladi.
- Yuqorida aytganimdek 2017 yil Ashxobodga borgandik. Muxlislar, zal, sharoitlar ajoyib bo'lgandi. Turkmanistonlik muxlislar futzalni sevishlarini ko'rsatishgandi. Umuman olganda bu safargi Osiyo chempionati ajoyib o'tadi deb o'ylayman. Eron, Yaponiya, Tailand nafaqat Osiyoning balki Jahonning eng kuchli jamoalaridan. Indoneziya, Vetnam, Livan va mezbon Turkmaniston ham o'z uyida bo'ladigan musobaqaga yaxshi tayyorlansa kerak. Guruhda qaysi jamoa tushishidan qatiy nazar Jahon chempionatiga chiqishga harakat qilamiz. Men murabbiylarimiz Bahodir Ahmedov va Nodir Eliboevga to'liq ishonaman. Xudo xohlasa Turkmanistondagi Osiyo chempionatidan yuzimiz yorug' bo'lib qaytamiz.

Narzulla Saydullaev suhbatlashdi