Hujjatlarni soxtalashtirish bilan bog'liq holat sabab "Neftchi" xodimlarining ishi O'FA qo'mitasida ko'rib chiqiladi

Transferning so'nggi kunida "Neftchi" klubi 4 nafar futbolchini ro'yxatdan o'tkazgan bo'lib, keyinchalik aniqlanishicha, undagi ayrim hujjatlar soxtalashtirilgan bo'lgan.

PFL mutaxassislarini "Neftchi" klubiga "Cementchi" jamoasidan kelib qo'shilgan futbolchilarga tegishli ayrim hujjatlar shubhalantirgan. Keyinchalik mazkur masalada o'rganishlar olib borildi va ayrim jihatlar qayta tekshirib chiqildi. Shundan so'ng PFL Associaciyaning maxsus inspekciyasiga murojaat qilib, mazkur ishni to'liq o'rganib chiqishni so'radi.

O'tgan davr davomida maxsus inspekciya to'plangan barcha malumotlarni o'rganib, "Neftchi" va "Cementchi" vakillari bilan suhbatlar o'tkazdi hamda masalaga oydinlik kiritdi. "Cementchi" tarkibida ro'yxatdan o'tgan 4 futbolchining shartnomasi yakuniga etmagan bo'lsa-da, ayni vaqtda "Neftchi" klubida faoliyat olib borayotgan xodimlar 25 fevral kuni Ligaga yuklanishi lozim bo'lgan hujjatlarni soxtalashtirgan.  

Reglamentning buzilishi holatlari aniqlanganidan kelib chiqib, aybdor shaxslar va klubga nisbatan sankciya qo'llash uchun ushbu ish O'FA tegishli qo'mitasiga oshirildi. Qo'mita qaror qabul qilgach, bu haqda batafsil malumot beriladi.