Hamidjon Aktamov: “Yigitlarimiz chinakam iroda namoyish etishdi”

-O'tgan turda o'z maydonimizda alamli mag'lubiyatga uchragandik, - deya so'z boshladi Hamidjon G'ulomovich.

- Teng kurashlar ostida kechgan bahsda “Mashal”ga imkoniyatni boy berganimiz muxlislarimizni qattiq ranjitgan edi. Ana shunday omadsiz o'yindan keyin yigitlarimizni navbatdagi turga tayyorlash oson emasdi. Xayriyatki, bugun mehmonda to'p surishimizga qaramay, jamoamizning barcha azolari bir tanu bir jon bo'lib, g'alaba ishtiyoqida o'ynadilar. Barcha yigitlarimizga rahmat aytaman. Albatta, bugun ko'rdilaringiz, Navoiydan ham yuzlab muxlislarimiz G'uzorga tashrif buyurib, futbolchilarimizni faol qo'llab-quvvatlab turdilar. Ularning daldasi jamoamiz uchun katta madad bo'ldi, desam xato qilmayman.

-O'yinda birinchi bo'lib o'z darvozasidan tezkor gol o'tkazib yuborish har qanday jamoaga salbiy va ruhiy tasir qilishi tabiiy. Bugun yigitlarimiz chinakam iroda namoyish eta oldilar va shuning evaziga muhim uch ochkoni qo'lga kiritdik.

-“SHo'rtan” - ancha shakllangan jamoa. Bu erda malakali murabbiy ishlaydi, tajribali o'yinchilari ko'p. Bugungi o'yinda ular tarkibida ko'proq yarim himoyachi Eldor Boymatovning o'yini menga yoqdi.

-Amaldagi mavsumda kim chempion bo'ladi? Qiziq savol bo'ldi-ku?! Hali chempionat tugashiga yana to'rtta tur bor. Bunga faqat oxirgi turdan keyingina aniq javob berishim mumkin.

-Oxirgi so'z o'rnida shuni aytishni istardimki, men “Qizilqum” jamoasi bilan birinchi marta G'uzorga kelishim. Rosti, vohaning bir tumanida bu kabi ajoyib futbol muhiti, chiroyli stadionni ko'rib juda xursand bo'ldim. Bunaqa futbol maydonida to'p surishni ko'p jamoalar orzu qilsa ajabmas. Bugun yigitlarimiz mazza qilib to'p tepishdi. Futbol uchun shunaqa shart-sharoitlarni yaratib bergan “SHo'rtan” futbol klubi xomiylari va rahbariyatiga o'z minnatdorchiligimni bildiraman.