Ham futbolchi, ham murabbiy sifatida “Nasaf”da qadr topgan SHuhrat Toshpo'latovni tabriklaymiz

Asli buxorolik bo'lgan mutaxassis Muborakning “Mashal” jamoasi orqali katta futbolga kirib keldi. Hujumchi ampulasidagi tezkor harakatlari, chiroyli gollari uni vohaning boshqa bir jamoasi “Nasaf”ga etakladi. 

Tez orada jamoaning muhim futbolchisiga aylana olgan forvard mahalliy ishqibozlarning mehrini qozona oldi. “Ajdarlar” Bahrom Hakimov murabbiyligida 2001 yilda ilk bor xalqaro maydonda ishtirok etdi va o'sha yili Osiyo CHempionlar Kubogi deb yuritilgan turnirda yarim finalga qadar etib bordi. Bunda albatta SHuhrat Toshpo'latov ham bir qator gollari bilan hissasini qo'shdi. 

Orada malum muddat G'uzorning “SHo'rtan” jamoasi sharafini munosib himoya qildi va “Nasaf” jamoasiga qaytdi. U o'z davrining mohir futbolchilari Zafar Xolmurodov, Komoliddin Kenjaev, Davron Fayziev, Ro'ziqul Berdiev kabilar bilan bir jamoada to'p tepdi. 

Butsalarini mixga ilgan futbolchi dastlab quyi ligada “Nasaf-2” jamoasida yoshlarga futbol sir-asrorlarini o'rgatdi. Murabbiy sifatida o'sayotgan va tajriba to'plab borayotgan Toshpo'latovni “Nasaf” o'rinbosarlariga ustozlik qiladi. 

2012 yilda Ro'ziqul Berdiev jamoa bosh murabbiyi etib tayinlangach SHuhrat Toshpo'latovni o'ziga assistent qilib oladi va birgalikda ish boshlashadi. Keyingi yillarda u mutaxassis bilan birgalikda ko'plab sovrinlarni yutdi. O'zbekiston kubogi, Superkubogi, chempionatdagi bronza va kumush medallariga ega chiqdi. 2017 yilda O'zbekiston terma jamoasida bitta uchrashuvda aniqrog'i BAA bilan kechgan o'rtoqlik o'yiniga Berdiev bilan birga jamoani tayyorladi.

Fursatdan foydalanib saytimiz ijodkorlari nomidan SHuhrat Toshpo'latovga o'zimizni samimiy va eng yaxshi tilaklarimizni tilab qolamiz!

Aziz Nuriy tayyorladi

foto: "Nasaf" FK