G'ulom-Haydar Gulyamov: “Omad “Nasaf”ga kulib boqdi”

- O'yin jangovor ruhda o'tdi. Ammo bugun omad raqib jamoasiga kulib boqdi. “Nasaf” tarkibidagi futbolchilar jamoada bir necha yildan beri birga to'p surib kelishadi. SHu sabab, ular bir-birlarini tezda tushinishib, o'yinga kirishib ketishadi. Lekin bu bilan raqibimiz bugun bizdan kuchliroq o'ynadi, deb o'ylamayman. Uchrashuv yakunida etiborni biroz chetda qoldirdik va qarshiliklar bundan oqilona foydalanib qolishdi.

- O'yin  davomidagi to'liq ustunlikni ushlab turishga tarkibdagi o'zgarishlar tasir qildimi yoki bunga boshqa sabablarni ko'rsatgan bo'larmidingiz?

- Futbol jamoaviy o'yin. Zaxiradan tushgan futbolchilar yomon o'ynadi, deb aytolmayman. Ammo zaxiradan o'yinga tushgan futbolchi uchun kurashga kirishib ketish biroz qiyinroq kechadi. Bundan tashqari tarkibimizda aksariyat futbolchilar yangi. Tan olish kerak, bu borada raqibimizda muammolar kamroq. SHu sababli, bu kamchiligimizni to'g'irlash ustida ko'proq ishlashimiz kerak, deb o'ylayman.

- “Nasaf” jamoasi tig'iz tuzilgan o'yinlar jadvali sababli tarkibidagi o'yinchilar charchashgan va ochiq futbol namoyon qilishmadi, shu sababli “SHo'rtan” bugun faolroq ko'rindi, degan fikrlar bildirildi. Siz ham shunday, deb o'ylaysizmi?

- Bu haqida biror bir fikr bildira olmayman. Sababi raqib jamoaning ichki ahvoli faqatgina ularning o'zlariga ayon. Lekin bugungi o'yinda bu narsa sezilmadi. Uchrashuv “derbi”ga xos keskin va murosasiz kurashlarga boy tarzda o'tdi va har ikki jamoa  futbolchilari harakatlarida charchoq sezildi, deb aytolmayman.