G'anisher Ismoilov "Navbahor"dagi vaziyat haqida

Klubdagi vaziyatni bilish maqsadida rahbariyatda bir necha yillardan buyon faoliyat yuritib kelayotgan, G'anisher Ismoilovga murojaat etganimizda quyidagilarni malum qildi.

- Rejamizga ko'ra, bugun futbolchilarni o'z bazamizda yig'dik. Ochig'ini aytganda, tarkib to'liq ko'rinishda emas. Buning sababi bor albatta. Kimdir kasal, yana ayrimlar turli malum sabablarga ko'ra, bugun jamoa ixtiyoriga etib kela olmagan. Mazkur yig'in 29 dekabarga qadar davom etadi. SHundan so'ng qisqa muddatli tatilga chiqib, keyin yana yanvarning tahminan 4 kunidan boshlab ikkinchi yig'inni boshlash ko'zda tutilmoqda.  

- Futbolchilar bilan joriy mavsum yakuniga bag'ishlab to'liq hisob kitob qilingani yo'q. Bu masala ayni paytda ijobiy tomonga hal etilmoqda. Nasib qilsa, shu oyning so'nggi kunlariga qadar barcha maoshlar beriladi.

- Tarkibga yangi futbolchilar qo'shilishi aniq. CHunki kelasi yilga raqobatni kuchaytirish uchun har bir chiziqqa futbolchilar taklif etiladi. Yuqorida aytib o'tganimdek, ayni paytda qarzdorliklar turibdi. Bunday paytda jamoaga yangi futbolchilarni taklif etish ham mantiqan to'g'ri kelmaydi. SHuning uchun yangi futbolchilar yanvar oyidagi yig'inimizga kelib qo'shilishi haqiqatga yaqinroq.

- Bugun yig'inning birinchi kuni bo'lganligi uchun futbolchilar bir mahal engil mashg'ulot o'tkazish bilan cheklandi. Ertadan boshlab ikki mahaldan shug'ullanishadi.

- Kelasi yil jamoa bosh murabbiyi kim bo'lishi ham tez kunlarda aniq bo'ladi. Ayni paytda No'mon Hasanov viloyat hokimi bilan bu borada suhbatlashib muzokara o'tkazmoqda. SHu tufayli mashg'ulotlarni hozircha Mustafo Bayramovning o'zi olib bormoqda", - deydi G'anisher Ismoilov "SA"ga bergan  intervyusida.