Futzal. Mashrab Odilov: “Kuchli irodamiz evaziga g'alaba qozondik”

Mazkur bahsda toshkentliklar ishonchli g'alabani qo'lga kiritdi, 5:1. O'yindan so'ng “Lokomotiv” etakchisi Mashrab Odilov bilan suhbatlashdik.
“Bugungi o'yin juda qiyin bo'lishini bilardik, - deya gap boshladi Odilov. SHunga o'zimizni har tomonlama tayyorladik. Kuchli jamoa ustidan g'alaba qozondik. Qolgan bellashuvlarda ham shu tariqa harakat qilamiz.

- “Lokomotiv” aynan nimaning evaziga g'alaba qozondi, deb o'ylaysiz?
- Biz bitta maqsad – himoyada ishonchli o'yin ko'rsatish va yaratilgan vaziyatlardan unumli foydalanishimiz muhim edi. O'yindan oldin barchamiz bilardik, raqib kuchli va ular ko'proq hujum tashkil qilishiga intilardi. “Lokomotiv” bugun kuchli iroda namoyish etdi. O'yin davomida yaratilgan har bir vaziyatimizdan to'g'ri foydalangan holda g'alaba qozondik.

- “Lokomotiv”ning bu mavsumdagi asosiy maqsadlariga to'xtalib o'tsangiz?
- Faqat chempionlik uchun kurashamiz. Tarkibimizda juda kuchli futbolchilar to'plangan. Oldimizda turgan har bir uchrashuvni yutishimiz va ochkolarimiz sonini ko'paytirib borishimiz lozim.

- Raqobatchi jamolar sifatida kimlarni ko'rsata olasiz?
- Men alohida birorta jamoani ko'rsatmoqchi emasman. Bu mavsumda chempionatda kuchli jamoalar to'planishgan va har bir klubning o'z oldiga qo'ygan maqsadlari bor. O'tkinchi o'yinlar yo'qligini ayta olaman.

- “Neftchi”ga qarshi kechadigan o'yin oldidan fikringiz qanday?
- Biz bu jamoa ishtirokidagi ikkita uchrashuvni kuzatdik. Jamoada yaxshi ijrochilar bor. Qolaversa, bosh murabbiyi ham ancha tajribali mutaxassis hisoblanadi. “Neftchi” bilan qiyin o'yin kechadi va bu bahsda g'alaba qozonish uchun maydonga chiqamiz.