Futzal. Bugun O'zbekiston Qirg'iziston bilan o'ynaydi

Uchrashuv Toshkent vaqti bilan soat 19:00da start oladi. 

Qirg'iziston milliy terma jamoasi Osiyo qitasining etakchi jamoalari safidan o'rin olgan. Jahon tasnif jadvalida Qirg'iziston ayni paytda 46-o'rinni egallab kelmoqda.

Qirg'iziston Respublikasi mustaqillikka erishgach, sportning futzal turini rivojlantirishga katta etibor berib kelmoqda. Mamlakat milliy terma jamoasi 1998 yilda tashkil etilgan bo'lib, dastlabki xalqaro uchrashuvini 1999 yilning 5 martida Singapur termasiga qarshi o'tkazgan va 9:5 hisobida g'alaba qozongan. Yon qo'shnilarimizning eng yirik hisobidagi g'alabasi 2006-yilning 10-fevral sanasiga to'g'ri keladi. O'shanda qirg'izistonliklar Guamni 14:0 hisobida dog'da qoldirishgan. Eng yirik mag'lubiyatni esa 1999-yilda Eron terma jamoasidan qabul qilib olgan – 0:21.

Osiyo chempionatlarida 1999-yildan buyon qatnashib keladi. Final raundiga 14 marta chiqishga muvaffaq bo'lgan. Eng yaxshi natijasi bronza medali. 2005-yili Vetnamda o'tkazilgan Osiyo kubogida O'zbekiston va Qirg'iziston terma jamoalari yarim finalda imkoniyatni Eron va Yaponiyaga boy berishgan. 3-o'rin uchun o'yin o'tkazilmagan va har ikkala jamoaga bronza medallari berilgan. 2006, 2007-yilgi Osiyo kuboklarida esa 3-o'rin uchun bahsda imkoniyatni boy bergan. Bu yillar Qirg'iziston futzalining eng gullagan davri edi.

2022 yilgi Osiyo kubogining saralash bahslaridan o'ta olmay, birinchi marta qita chempionatini o'tkazib yuborgan. 2023-yilda terma jamoa ruliga ispaniyalik mutaxassis Luis Bernat Molina bosh murabbiy etib olib kelindi. Mazkur mutaxassis tarkibda avlodlar almashinuvi jarayonini muvaffaqiyatli amalga oshirdi. Qirg'iziston terma jamoasi 2024-yili Osiyo chempionatiga qaytdi. Guruh bahslaridan muvaffaqiyatli o'tib, nimchorak finalda Eronga 1:6 hisobida yutqazib qo'ydi. Ayni paytga kelib Luis Bernat Molina “Barselona” futzal klubi murabbiylar shtabiga kiritilgan. Shu boisdan ham mazkur saralash bahslari yakunlangach, Molina Qirg'iziston terma jamoasini tark etadi va Kataloniyaga yo'l oladi.

Qirg'iziston terma jamoasi Osiyo kubogi final bosqichida 16 marta qatnashib, 72 uchrashuvda maydonga tushgan: 30 ta g'alaba, 12 ta durang, 30 ta mag'lubiyat. Kiritilgan va o'tkazib yuborilgan to'plar farqi – 224:264, -40. Jamg'arilgan ochkolar – 102 ta.

O'zbekiston terma jamoasi bilan xalqaro maydonlarda 15 marta kuch sinashgan bo'lib, faqatgina 1 ta o'yinda g'alaba qozongan. 2 ta uchrashuvda durang natija qayd etilgan. 12 ta uchrashuv O'zbekiston terma jamoasining g'alabasi bilan intiho topgan.