Futzal. Aleksandr Alshevski: "Bunday muxlislar qarshisida mezbonlar bilan o'ynash juda qiyin"

Uchrashuv 1:1 hisobida yakunlandi. O'yindan so'ng belaruslik Aleksandr Alshevskidan fikr oldik.

"O'yin juda ham og'ir o'tdi, O'zbekiston yuqori saviyadagi terma jamoa. Biz ular bilan o'tgan yili Ozarbayjonda ham o'zaro bellashgan edik. Bugun terma jamoangiz to'g'ri yo'ldan ketayotganligini isbotladi, yildan-yilga jamoa o'yini kuchayib bormoqda, O'zbekistonga qarshi o'ynash o'tgan yilgiga qaraganda qiyinroq bo'ldi. O'zbekiston futzalni rivojlantirish borasida to'g'ri yo'ldan ketayapti deb hisoblayman, o'sish darajasi yuqori.

Biz kuchli qarshilikni kutgan edik, muxlislarning juda faol tarzda qo'llab-quvvatlashi ostida mezbonlarga qarshi o'ynash oson emas. Boshqacha qilib aytganda, bunday muhitda oyoqlar o'zi yuguradi. To'p o'tkazib yuborganimizdan keyin katta kuch bilan oldinga o'tdik va hisobni tenglashtirishga muvaffaq bo'ldik.

Ushbu turnirda qatnashayotgan terma jamoalarning barchasi yuqori saviyadagi jamoalardir. Ozarbayjonni hatto top darajada desa ham bo'ladi, tarkibdagi mahalliylashtirilgan braziliyaliklar hisobiga yanada kuchli bo'lishgan. Qozog'iston tarkibida ham braziliyalik futzalchilar bor, ular ham juda kuchli. Demak, sizning jamoangizga ham, bizga ham keyingi ikkita o'yinda juda qiyin bo'ladi", - deydi Aleksandr Alshevski.


Tolibjon Qosimov