Fotomaqola: Dilyaver Vaniev futbolchilik faoliyatini yakunladi

"Zarafshon" va "Navbahor" jamoalarida bir mavsum to'p tepkan 3-raqam egasi, 2005 yildan beri Muborakda. Orada bir mavsum "Andijon" libosini kiydi. Hatto klub 1 ligaga tushib ketgan yili ham Vaniev jamoasiga sodiq qolgan edi.

1975 yilda tavallud topgan futbolchi roppa-rosa 39 yoshigacha futbol o'ynadi. Doimiy ravishda o'z saviyasini bir xil tarzda ushlab tura olgan Vaniev o'z jamoasining rosmanasiga afsonasiga aylana oldi. 

Gabit Sapargaliev va Dilyaver Vanievning klub oldida tutgan o'rinlar kattaligiga kechagi o'yinda yana bir bor ishonch xosil qildik. O'yin boshlanishi arafasida barcha-barcha ular uchun ishlab chiqilgan dasturni tomosha qilishga "majbur" edilar. Boisi bu ikki futbolchi bunga o'z mehnatlari bilan erishdilar. 

Oliy liga doirasida bironta futbolchi bilan xayrlashganimizni eslay olmaymiz. "Mashal" esa bu borada barchaga o'rnak bo'la oldi deb o'ylayman. O'yinni Sapargaliev va Vaniev ramziy manoda boshlab berdilar.

Birinchi bo'lim yakuniga etmasidan turib hakamning hushtagi yangradi va Vaniev sardorlik bog'ichini Fayzievga taqqan holda, ikki jamoaning olqishlari ostida maydonni tark etdi...

Bu paytga kelib allaqachon uning ko'z yoshlari oqib bo'lgandi. Juda ham tasirli holat. 

"Men bilan bunday xayrlashadilar deb o'ylamagan edim. Oliy ligamizda bunday holatni hali ko'rmaganman. SHuning uchun klub rahbariyatiga o'zimning alohida tashakkurimni etkazgan bo'lar edim", - deydi Dilyaver Vaniev.

XAYR FUTBOLCHI - VANIEV, SALOM MURABBIY - VANIEV!

Nodirxo'ja Yuldashev