Eldor Moyliev: "Vaziyatni o'nglash uchun yutmasak bo'lmasdi"

- Bu o'yinga juda jiddiy va puxta tayyorgarlik ko'rdik. Vaziyatni o'nglash uchun yutmasak bo'lmasdi. Kutilmaganda o'z xatomiz sabab tezkor gol o'tkazib yubordik. Lekin keyinchalik ikkita to'p kiritib g'alabani o'z tomonimizga og'dira oldik va buning uchun futbolchilarga rahmat aytaman. G'alabani esa G'uzor ahliga bag'ishlaymiz. Bizni qo'llab turgan muxlislarga ham alohida rahmat aytib qolamiz.

- O'tkazib yuborilgan gol haqida fikringiz?

- Futbolda hamma narsaga tayyor turish lozim. Biz buni doim yigitlarga uqtirib kelyapmiz. Biz hech qachon qo'lni tushirmaymiz va oxirigacha kurashamiz.

- Ikkinchi taym boshida himoyada o'zgarish bo'ldi. Bu nima bilan bog'liq?

- Raqib bir o'yinchi kam bo'lib qolgach, faqat hujumni o'yladik. Bilasiz, Jo'rabek Mannonov tezkor futbolchi va hujumga juda yaxshi qo'shiladi. Shu bois ham uni maydonga tushirdik.

- Javohir Hasanovning o'yini haqida fikringiz?

- Biz hamma qatori unga ham imkoniyat beramiz. Bugun Abror Toshqo'zievga imkon bergandik, mana o'zini ko'rsatib gol urdi. Boshqa futbolchilarda ham maydonga tushish uchun albatta imkoniyat bo'ladi.

- Jamoaga hujumchi kerak deb hisoblaysizmi? Chunki vaziyatlar bo'lyapti, lekin gol urishga jamoa qiynalyapti.

- Har matbuot anjumanida bu haqda so'z boryapti. Bizda 2006 yil tug'ilgan futbolchi hujum chizig'imizda o'ynayapti. To'g'ri aytdingiz, tajribali hujumchi kerak. Shuningdek, raqobat bo'lishi uchun qanotlarga ham kuchli o'yinchilar zarur. Tarkibimiz qanday ko'rinish olishini vaqt ko'rsatadi.