Dilshod Nuraliev: “G'alabani barcha yurtdoshlarga bag'ishlaymiz”

- Bugungi yutuqdan juda xursandmiz. Stadionga kelib qo'llab turgan muxlislarga ham rahmat. G'alabani butun O'zbekiston ahliga bag'ishlaymiz. Hamma ko'rdi, o'yin juda og'ir kechdi, ayniqsa birinchi bo'limda o'zimizdan kutilgan futbolni namoyish qila olmadik. Avvalgi uchrashuvda ham shunga o'xshash hol sodir bo'lgandi. Xorvatiya texnik va taktik jihatdan juda kuchli jamoa ekan, menga ularning harakatlari yoqdi. Raqib safida 10-raqamda to'p surgan Xalilovich juda iliq taassurot qoldirdi. Agar u jarohat olib, maydonni tark etmaganida menimcha, raqibni yuta olmagan bo'lardik. To'g'risini aytsam, men ham jamoamda Xalilovichga o'xshagan futbolchi bo'lishini xohlayman.

- Jamoangiz keyingi bosqichda Gondurasga qarshi kurash olib boradi. Bu jamoani Panamaga o'xshash deb hisoblaysizmi?
- Malumki, Gonduras ham KONKAKAF mintaqasi vakili hisoblanadi. Keyingi bosqichda kim bilan o'ynashimiz mana endi malum bo'ldi va ertadan navbatdagi uchrashuvga tayyorgarlikni boshlab yuboramiz. Gondurasning guruhdagi o'yinlarini diqqat bilan o'rganib chiqamiz va shunga yarasha hozirlik ko'ramiz. Bilishimcha, gondurasliklar baquvvat futbolchilar va ular bilan ham oson bo'lmaydi. Bizda raqibni mensimaslik degan narsa yo'q. Gonduras o'z guruhidan chiqdimi, demak, shunga yarasha kuchli jamoa.

- O'zbekiston o'smirlar termasi guruh o'yinlarida atigi bitta gol o'tkazdi va boshqalar bilan taqqoslaganda eng yaxshi ko'rsatkichni qayd etdi. SHu haqda nima deya olasiz?
- Men murabbiy sifatida urilgan va o'tkazilgan gollarga unchalik ahamiyat bermayman. Bunga ko'proq jurnalistlar va muxlislar qiziqishadi. Men uchun ko'proq yakuniy natija muhim. Biz umumjamoa sifatida nimaga erisha olamiz, meni ko'proq shu qiziqtiradi.

Xayrulla Xoliqov