Davron Fayziev: “Bizga omad etishmayapti”

– Barcha guvoh bo'ldi – bugun juda qiziqarli o'yin bo'ldi. Lekin natija bizning foydamizga ishlamadi. Biz so'nggi turlardagi uchrashuvlarimizdan so'ng o'zimizga bo'lgan ishonchni qaytarayotgan edik. Muxlislar bizdan albatta chiroyli o'yin va g'alaba kutishayotgan edi. Bugungi natija uchun ulardan uzr so'rayman.

Bizning og'ir kunlarimizda ham, xursandchilik kunlarimizda ham tinmay qo'llab-quvvatlab turishayotganliklari uchun muxlislarga rahmat aytaman. Ularni ishonchini oqlashga harakat qilamiz. O'yin haqida to'xtaladigan bo'lsam, o'yin birinchi to'p kiritilgunga qadar davom etdi. Agar biz birinchi bo'lib to'p kiritganimizda biz g'alab qozonardik.

Umumiy tomonlama olib qaralganda bugungi o'yin durrangga mos edi. Tashkillashtirgan ko'plab xavfli vaziyatlarimizda so'nggi zarbani beradigan futbolchi topilmadi. Turnir jadvalining pastki qismida juda qizg'in kurash ketayapti. Bu kurashda oldindan qo'l ko'tarish bo'lmaydi. Ko'p uchrashuvlarda etarlicha 100 foiz golga tortadigan vaziyatlar yaratayapmiz. Ularni golga aylantirishda mahorat va omad etishmayapti. Omad ham o'z-o'zidan kelavermaydi. Omad kelishi uchun tinmay mehnat qilish lozim. Omadni o'z tomonimizga og'dirish yo'lida ishlashda davom etamiz.

Jasur Hakimov kecha jamoa mashg'ulotlariga qo'shildi. Unda charchoq alomatlari borligi uchun tarkibga kiritmadim. SHuningdek “Neftchi” jamoasiga qarshi salkam ikki hafta davom etgan mashg'ulotlarimizda ham Jasur ishtirok etmagandi”, - deydi Davron Fayziev.