Buyuklik oddiylikdan boshlanadi!

Bir necha daqiqa avval futzal bo'yicha jahon chempionatining nimchorak final bosqichiga yo'llanmani qo'lga kiritdik. Bu futzalimiz tarixida ilk bor ro'y bergan katta voqelik, ulkan g'alaba. SHubhasiz, bu yutuq barchamizniki. Lekin yuqorida tilga olingan 2 sifatga (buyuklik bilan oddiylik) hech birimiz davo qila olmaymiz. Bugun maydonda o'ynagan yigitlardan bo'lak.

Gap g'alaba yoki ko'rsatilgan natijada emas. Mundialda guruhdan chiqishni uddalagan yigitlarga nisbatan munosabatda. Terma jamoamiz jahon chempionati oldidan Ispaniya va Portugaliyada o'quv-mashg'ulot yig'inini o'tkazdi. Qisqa qilib aytganda, Bahodir Ahmedov shogirdlari Toshkentni 13-dan 14 avgustga o'tar kechasi tark etgandi.

Nihoyat, o'sha tunni esga olish uchun qulay fursat topdik. Mundialga ketayotgan yigitlarni kuzatib qo'yish marosimi "kosmos" darajada tashkil qilingan edi. Na fan-klub, na O'FA rahbariyatidan kimdir aeroportga chiqdi. OAV vakillaridan faqat Championat.asia fotografi Jahongir Fayzullaev ikkimiz bor edik ( biz tayyorlagan eksklyuziv lavha quyida ↓↓↓).

O'shanda futzalchilar bilan birinchi marta jonli muloqotda bo'ldim. Reja bo'yicha terma jamoa azolari mehmonxonadan aeroportga O'FAning maxsus avtobusida Championat.asia'ning 2 xodimi esa taksida etib olishi kerak edi. Lekin biroz avval Misrni enggan yigitlar bizni ham avtobusga taklif qilib, joy bo'shatib berishdi. Xursand bo'ldik, ish jarayoni yo'lda ham davom etdi. Etiborli jihati, yosh futzalchilarning hech biri intervyu berishni xohlamadi. Kimga murojaat qilsak, tajribali Dilshod Rahmatov yoki Rustam Umarovni ko'rsatardi.

O'sha kuni amin bo'ldimki, nafaqat mundialga 1-bor ketayotgan yoshlar, balki Rahmatov va Umarov ham oddiy insonlar ekan. O'sha avtobusda hech kim "yulduz" emasdi. Barchasi samimiy, sodda yigitlar. SHu tufayli bugungi g'alabadan keyin Tolstoydan iqtibos keltirishga qaror qildim. CHunki o'sha kuni guruhdan chiqishga vada bergan jamoa futzalimiz tarixida yangi sahifa ochishni uddaladi!

...aeroportdan qaytar ekanmiz, terma jamoa azolaridagi samimiyat va ularning o'z darajasida qadrlanmasligi haqida suhbatlashgan bo'ldik. To'g'risi, juda xunuk holat edi. Kimlargadir xalqaro musobaqalardagi ishtiroki uchun katta mukofotlar berilgan paytda mundialda madhiyamiz yangrashini taminlagan yigitlarga tantanali kuzatish marosimi ham yo'q...

Aslida futzalimiz futbol yoki sportning boshqa turlaridan bir qadam oldindaligini isbotlashdan hech charchamagan. Umid qilamizki, unga etibor ham qachondir eng kamida futbol darajasiga chiqadi. Hech bo'lmasa, qahramonlarni kutib olish marosimida faqat men va ukam (J. Fayzullaev) emas, rahbarlar va muxlislar ham bo'lishadi...

Faxriddin Ro'ziev