“Bunyodkor” tarbiyalanuvchilari Turkiyadan 1ta oltin va 2ta bronza medallari bilan qaytishmoqda

Turnirda jami 43ta jamoa ishtirok etdi. SHulardan to'rtta jamoani “Bunyodkor” futbol maktabining turli yosh toifasidagi tarbiyalanuvchilari tashkil etdi.

Aytish joizki, yosh “qaldirg'ochlar” musobaqani ko'tarinki ruhda o'tkazishdi.

Aleksandr Stromilov boshchiligidagi 2006/2007 yillarda tavallud topgan futbolchilarimiz o'z yosh toifalarida “Krilatskoe” (Moskva, Rossiya), “Lokomotiv” (Moskva, Rossiya) va “Zenit” (Sankt-Peterburg, Rossiya) jamoalarini mag'lubiyatga uchratishib, turnirning oltin medallarini qo'lga kiritishdi.

2004/2005 yillarda tavallud topgan futbolchilarimiz o'z guruhlarida Germaniyaning “Verder” klubidan keyin ikkinchi o'rinni band etishgandi. Mirkamol Qosimov va Temur Boboxonov shogirdlari 3-o'rin uchun bahsda Toshkentning “Lokomotiv” jamoasi bilan kuch sinashishib, 1:0 hisobida g'alaba qozondilar va bronza medallarini qo'lga kiritdilar.

“Bunyodkor”ning 2002 yilda tavallud topgan tarbiyalanuvchilari turnirni yaxshi saviyada o'tkazishdi, deyish mumkin. Ikkita jamoa bo'lib qatnashgan U-13 jamoalarimiz yarim finalda “Beshiktosh” (Stanbul, Turkiya) va “CHertanovo” (Moskva, Rossiya) jamoalariga imkoniyatni boy berib qo'yishdi. Natijada bronza medallari uchun bahsda Akmal Risqullaev boshchiligidagi “Bunyodkor-A” jamoasi bilan Sergey CHigodaev murabbiyligidagi “Bunyodkor-B” jamoalari kuch sinashishdi. Qiziqarli kechgan bahsda asosiy jamoamiz g'alaba qozondi.

SHu tariqa, “Bunyodkor” futbol maktabi tarbiyalanuvchilari Turkiyada tashkillashtirilgan “Lukoil Turkish Holidays” musobaqasidan 1ta oltin va 2ta bronza medallari bilan yurtimizga qaytadigan bo'lishdi.

Ushbu HAVOLA orqali “Bunyodkor” tarbiyalanuvchilarining musobaqadagi fotojamlanmasi bilan tanishishingiz mumkin.