“Bunyodkor” raqiblarida nima gap?

O'yin “Paxtakor” stadionida 17:00da boshlanadi. Oradan bir soat o'tib Eronda guruhdagi ikkinchi o'yin “Fulad” – “Al Fath” bahsi start oladi. Bunda qayd etiladigan natija ham “qaldirg'ochlar” uchun juda muhim.

Ayni paytda guruhdagi to'rttala jamoa ham 1 ochkodan ega. Kim g'alaba qozonsa, turnir javalida yuqoriga ko'tarilib oladi. “Al Fath” – Saudiyaning amaldagi chempioni hisoblanadi. Lekin jamoa bu yilgi mavsumda o'zini ko'rsata olmayapti. “Al Fath” 14ta jamoa orasida 7-o'rinda boryapti.

“Biz uchun “Fulad” bilan kechadigan bahs juda muhim, - deydi saudiyaliklar ustozisi Fathi Al Jabal. – Har ikki jamoa yutishni xohlayapti, demak bizda ham imkon bor. “Fulad” birinchi turda yaxshi taassurot qoldirdi, biz ularning o'yini haqida malum tasavvurga egamiz. Tarkibdagi barcha futbolchilar bu o'yinga tayyor. Safimizda jarohat olganlar yo'q”.

“Fulad” bosh murabbiyi Hosseyn Faraki klubni ajoyib tarzda boshqarmoqda. “Fulad” Eron chempioni bo'lishga juda yaqin turibdi. Bugungi o'yinda maydon egalari safida hujumchi Arash Afshin tusha olmaydi.

“Menga malum bo'lishicha, Saudiya klubi bizdan uch ochko olmoqchi ekan. Bunday niyat yaxshi, lekin biz ham qarab turmoqchi emasmiz. Hammasini maydondagi o'yin ko'rsatadi. OCHLda o'ynash borasida “Fulad” aytaylik, “Bunyodkor” singari katta tajribaga ega emas, biroq biz ham o'zimizni ko'rsatishni xohlaymiz”.