Bugun futbol. "Qo'qon-1912" - "Paxtakor"

Bugun bo'lib o'tadigan "Qo'qon-1912" - "Paxtakor" bahsi haqida ko'p gapirildi. Hech shubhasiz bu o'yin turning markaziy uchrashuvi bo'ladi. Toshkentda bo'lib o'tgan 1-davra bahsida 1:1 hisobi qayd etilgandi va uchrashuvni toshkentlik hakam SHerzod Qosimov boshqarib borgandi.

Qizig'i shundaki, Qo'qondagi bellashuvni ham shu hakam boshqaradi. Turnir jadvalida "Paxtakor" 43 ochko bilan peshqadamlik qilishda davom etmoqda. Qo'qonliklar esa 27 ochko to'plagan holda 6-o'rinni egallab turishibdi. Kuchli oltilikka kirib olishda "Qo'qon-1912" uchun bugungi bahs muhim ahamiyat kasb etadi.

"Qo'qon-1912" bugun o'z maydonida ushbu mavsum hisobidan 11-uchrashuvini o'tkazadi. Bungacha o'tkazilgan 10ta o'yinning 5tasida No'mon Hasanov shogirdlari zafar quchgan. Ikki bor durang qayd etilgan bo'lsa, uchta o'yinda imkoniyatni boy bergan. To'plar nisbati 12-8. "Qo'qon-1912" uydagi bahslarda 17 ochkoni qo'lga kiritgan.

Yana bir qiziq malumot, xuddi "Qo'qon-1912" uyda qayd etgan ko'rsatkichlarni "Paxtakor" safarda ko'rsatgan. Yani, "Paxtakor" safarda besh bor g'alabaga erishib, ikki bor durang o'ynagan va uch marta yutqazib qo'ygan. "Paxtakor" ham safar o'yinlarida 17 ochkoli bo'lgan. Faqat to'plar nisbati biroz farq qiladi: 13-7.

Bilasizmi? "Qo'qon-1912" Superligadagi oxirgi to'rtta o'yindan uchtasini g'alaba bilan yakunladi. Jamoa o'z maydonida AGMK va "So'g'diyona"dan ustun kelgan bo'lsa, safarda "Bunyodkor"ni mag'lub etib qaytdi.

Fakt: "Paxtakor" ketma-ket ikki turdan beri g'alaba qozona olmayapti. "SHerlar" Namanganda "Navbahor"ga imkoniyatni boy berib, Toshkentda "Loko" bilan durang o'ynashdi.