Bugun futbol. "Qo'qon-1912" - "Buxoro"

"Qo'qon-1912" o'z maydonida "Buxoro"ni qabul qiladi. Bugungi bahsda ikki yosh murabbiyning o'zaro qarama-qarshiligiga guvoh bo'lamiz. Malumki, No'mon Hasanov ham, Ulug'bek Baqoev g'alabaga chanqoq murabbiylar sirasiga kiradi. Ularning ikkalasi ham o'z ustida ishlaydiganlar toifasidan. 

Mana shu jihat ham bugungi o'yinning qiziq kechishiga sabab bo'lishi mumkin. Ustunlik borasida bir narsa deyish qiyin, har holda "Qo'qon-1912" o'z maydonida o'ynaydi, "Buxoro" esa safarda. Lekin buxoroliklar safarda ham yaxshi o'ynay olishadi. To'g'ri, bu jamoa oxirgi uchta turni mag'lubiyat bilan yakunladi, biroq bu hol bugungi o'yinda mehmonlarning kayfiyatiga tasir qilmasa kerak. 

Bilasizmi? "Qo'qon-1912" qatorasiga 8ta (!) o'yindan beri yutqazmayapti. Jamoa shundan ikkitasida g'alaba qozongan va olti bor durang o'ynagan. Umuman olganda, qo'qonliklar Superliga klublari orasida eng ko'p durang qayd etgan jamoa bo'lib turishibdi. 

Yana bir malumot shuki, No'mon Hasanov jamoasi hozircha o'z maydonida yutqazmagan: ikki g'alaba va ikkita durang. Bundan tashqari, qo'qonliklar to'rtta o'yinda atigi bir marta gol o'tkazib yuborishgan. 

Fakt: "Qo'qon-1912" oxirgi ikkita o'yinni bir xil 1:1 hisobida yakunladi. 

"Buxoro" haqida gapiradigan bo'lsak, bu jamoa ham bu yil quvnoq o'yin namoyish etmoqda. "Buxoro" doim hujum qilishni xush ko'ruvchi jamoalardan biri. Bu tomonlama ikkala jamoa bir-biriga o'xshab ketadi. Ammo "Buxoro"ning oxirgi paytlarda o'yini qovushmayotgandek, negaki jamoa qatorasiga uchta o'yinda yutqazib qo'ydi. 

Bilasizmi? "Buxoro" 5-8 turlar orasida ketma-ket to'rtta g'alabaga erishib yaxshi natija qayd etdi. Ammo shundan so'ng qatorasiga uch mag'lubiyat boshlandi. 

Fakt: "Buxoro" hozircha safarda beshta o'yin o'tkazib, faqat bittasida g'alaba qozongan. To'rtta o'yinda mag'lub bo'lgan. "Buxoro"ning hozircha yagona bo'lib turgan g'alabasi "Neftchi" ustidan qo'lga kiritilgan.