Bugun futbol. "Olmaliq" - "Mashal"

Turnir jadvalida "Olmaliq" 32 ochko bilan 9-o'rinni egallab turibdi. "Mashal" hisobida esa 35 ochko bor va bu jamoa 8-o'rinda bormoqda. Demak, bugun Olmaliq shahrida jadvalning yonma-yon o'rinlarida borayotgan jamoalar o'zaro bahs olib borishadi. 

Ikkinchi davradagi "Olmaliq" birinchi davradagi jamoadan birmuncha farq qiladi. Jamoa oraliq tanaffusdan so'ng hozircha to'qqizta o'yinda maydonga tushgan bo'lsa, shundan faqat ikkitasida g'alaba qozongan. Va har ikkala g'alaba ham uydagi bahslarda qo'lga kiritilgan. "Olmaliq" o'zidan kuchsiz jamoalar - "So'g'diyona" bilan "Obod"ni mag'lub etgan.

Bilasizmi? "Olmaliq" qatorasiga uch o'yindan beri g'alaba qozona olmayapti. Jamoa "Qizilqum" bilan durang o'ynaganidan so'ng ketma-ket ikkita bellashuvda yutqazib qo'ydi. 

"Mashal" haqida gapiradigan bo'lsak, bu jamoa ikkinchi davrani yaxshi boshladi, ammo oxirgi uch o'yinda g'alabaga erisha olmadi. Muborakliklar avvaliga Toshkentda "Lokomotiv" bilan durang o'ynashdi va keyingi turlarda gol o'tkazmasdan "Metallurg" va "SHo'rtan" ustidan zafar quchishdi. "Mashal" hatto safarda "Qo'qon-1912"ni ham mag'lub etib qaytdi. 

Biroq jamoa "Buxoro"ga qarshi 1:1 hisobini qayt etganidan so'ng safarda "Bunyodkor"dan engildi va uyda "So'g'diyona" bilan 0:0 o'ynadi. Fakt shuki, "Mashal" oxirgi uch o'yinda atigi bittagina gol ura oldi xolos. 

Bilasizmi? "Mashal" ikkinchi davrada to'rtta g'alabaga erishgan bo'lsa, shundan ikkitasi Muborakda va yana ikkitasi safar o'yinlarida qo'lga kiritilgan.