Bugun futbol. "Nasaf" - AGMK

Turnir jadvalida "Nasaf" 23 ochko bilan ettinchi, AGMK esa 17 ochko to'plab 10-o'rinda bormoqda. 

Ikkala jamoa ham o'tgan turda g'alaba qozongan bo'lsa-da, avvalgi turlardagi omadsiz ishtirok jamoalar natijasiga soya solmoqda. Xususan "Nasaf" bungacha ketma-ket beshta turda g'alaba qozonmagan bo'lsa, AGMK qatorasiga oltita o'yinda uch ochko nimaligini bilmadi. 

Bugungi o'yinda kimning imkoniyati yuqori? Tarkib tomonlama qaraydigan bo'lsak, AGMKda tajribali futbolchilar ko'p. Faqat hamma gap Baxtiyor Ashurmatov ushbu tarkibni qanchalik shakllantirganida. AGMK avvalgi tur "Buxoro"ni ishonchli tarzda mag'lub etib, Qarshiga ko'tarinki kayfiyatda yo'l oldi. 

"Nasaf"da yaqqol etakchi deyarli yo'q va asosiy urg'uni jamoaviy o'yinga berib kelmoqda. "Nasaf" shu paytgacha o'z maydonida 9ta o'yin o'tkazib, shundan to'rttasida g'alabaga erishgan. Uch bor durang o'ynab, ikkita o'yinda mag'lub bo'lgan. To'plar nisbati 13-9. 

AGMK esa safarda 9 bor maydonga tushib, faqat ikkita bahsda uch ochkoli bo'lgan. Bir marta durang qayd etib, 6ta o'yinda yutqazib qo'ygan. To'plar nisbati 9-17. 

Bilasizmi? AGMK safardagi ikkita g'alabasini "Neftchi" va "Metallurg" ustidan qo'lga kiritgan. 

Yana bir malumot shuki, Ro'ziqul Berdiev bugun "Nasaf" bosh murabbiyi sifatida oliy ligada 170-o'yinini o'tkazadi.