Bugun Angliyada futbol. "CHelsi" - "Lester"

Angliya Premer-ligasi. 8-tur
CHELSI - LESTER SITI
Boshlanish vaqti: 16:30

Turnir jadvalidagi o'rni: "CHelsi" 7-o'rinda (13 ochko), "Lester" 12-o'rinda (8 ochko).
Ochkolar orasidagi farq - 5 ochko.

Tarif: Bu turda mamlakatning amaldagi chempioni bilan avvalgi chempion o'zaro bahs olib borishadi. Hozircha imkoniyatlar teng baholanmoqda. Faqat biroz ustunlik maydon egalari "CHelsi" tomonida bo'lishi mumkin. Hozircha ikkala jamoa ham o'zidan kutilgan o'yinni namoyish eta olmayapti. Natijada turnir jadvalida o'rta o'rinlarda borishmoqda.

Fakt: "CHelsi" o'z maydonida uchta uchrashuv o'tkazib, hozircha shundan ikkitasida g'alaba qozondi va bir bor mag'lub bo'ldi. Jamoa o'z maydonida "Vest Xem" va "Bernli"dan ustun kelgan hamda "Liverpul"ga imkoniyatni boy bergan.

Fakt: Yangi mavsumni ketma-ket uchta g'alaba bilan boshlagan Antonio Konte shogirdlari keyinchalik uchta turda g'alaba qozona olishmadi. Faqat oxirgi bahsda "Xall Siti" 2:0 hisobida mag'lub etildi.

Fakt: "Lester" o'tgan mavsum 38ta o'yindan faqat uchtasida mag'lub bo'lgandi. Jamoa bu gal ettita o'yinda maydonga tushgan bo'lsa, allaqachon uch bor yutqazishga ulgurdi. Va qizig'i, uchala mag'lubiyat ham safar bellashuvlarida ro'y berdi. "Lester" safarda "Xall Siti", "Liverpul" va MYUga imkoniyatni boy bergan.

Fakt: "Lester" oxirgi ikkita safar o'yinida bir xil 1:4 hisobi bilan mag'lub bo'ldi. Jamoa safarda hozircha uchta gol urib, o'z darvozasidan 10ta to'p o'tkazib yuborgan.

Fakt: O'tgan mavsum "CHelsi" o'z maydonida bu jamoa bilan 1:1 hisobini qayd etgan.