Botir Qodirqulov: "Yana katta futbolga qaytmoqchiman"

Odatga aylanib qolgan futbolchilarning o'yinoldi fikrlari bilan tanishish o'rniga bugungi  “Neftchi” – “SHo'rtan” uchrashuvi oldidan jamoamizning sobiq futbolchisi va endingi yordamchi murabbiyi – Qodirqulovning futbolchi sifatida ushbu o'yinga qarashlari haqida malumot berishga qaror qildik.

- Murabbiylik, futbolchilikdan ancha masuliyatli va murakkab ish ekanligini endi anglab etayapman. Hozirgi holatimda maydonga tushib jamoamga yordam berish istagi kundan-kunga kuchayib bormoqda. “SHo'rtan”ning mavsumni bu qadar omadsiz boshlashi meni ham ko'pchilik qatori juda ham o'ylantirmoqda. Xudo xohlasa, sog'lig'imni tiklab olsam, ikkinchi davrada Rahbariyat bilan maslahatlashgan holda maydonga qaytmoqchiman.

- “SHo'rtan”ning o'yinlariga to'xtaladigan bo'lsam, jamoamiz yomon o'ynayapti deya olmayman. Yigitlar astoyidil harakat qilishmoqda. O'yinoldi mashg'ulotlarni ham bor kuch va g'ayratlari bilan o'tkazishmoqda. O'yinlarda ham jamoamiz ko'plab vaziyatlarni sodir qilishga erishayapti, ammo nima sabab bilmadim-u, yakunlovchi holatlarni samarali yakunlay ololmayapti. Jamoadoshlarimning g'alabaga va natijani qo'lga kiritishga ishtiyoqi baland. Garchi so'ngi uchrashuvda “Lokomotiv”ga yutqazgan bo'lsakda ana shu ishtiyoq o'yin davomida ko'rinib turdi. Buni maydonga tashrif buyurgan muxlislarimizning uchrashuvning so'ngi daqiqalariga qadar kuzatib, jamoamizni qo'llab-quvvatlaganidan ham bilsak bo'ladi. Tarkibimizda ajoyib futbolchilar bor. Ishonchim komil, yigitlarning harakati va yuqorida aytib o'tganimdek, ishtiyoqi  bugun Farg'onada o'zining ijobiy natijasini beradi – dedi Botir Qodirqulov o'z fikr va mulohazalarini yakunlab.

"SHo'rtan" matbuot xizmati