Darvozalarga 9ta gol urilgan "Paxtakor" - "Neftchi" uchrashuvini yodga olamiz

O'z nomi bilan "O'zbekcha el-klasiko", deb nom berilgan. Boshqacha aytganda "mumtoz futbol". Quyida esa ikki jamoa tarixidagi eng sermahsul uchrashuv bir emas, ikki emas, uch emas naqd 9ta gol urilgan uchrashuvni yodga olamiz. 

Toshkent klubi o'sha yil Viktor Jalilov boshchiligida O'zbekiston oliy ligasida 74 ochko bilan chempion bo'lgandi. 9 avgust kuni bo'lib o'tgan O'zbekiston kubogi finalida Farg'onaning “Neftchi” klubiga qarshi shiddatli bahs 6:3 hisobida “sherlar” foydasiga hal bo'lgandi. Yangilanish davrini boshlagan "Paxtakor" tarkibga barcha mahoratli nomlarni jamlagan, shuning samarasi o'laroq o'sha yili Osiyoning eng yaxshi jamoasi, deb etirof etilgandi. "Neftchi" esa Yuriy Sarkisyan bilan chempionatda ikkinchi o'rinni band etgan, oltin medallarga 5 ochko etmagan. 

"Neftchi" libosida "Paxtakor"ga qarshi har bir uchrashuv yodimda. Bittasini tanlashga kelsak, 2002 yilgi O'zbekiston Kubogi finalidagi 3:6 hisobida mag'lub bo'lgan o'yin. Bunday final yana qaytarilmasa kerak",- deydi o'sha finalda "Neftchi" libosida to'p tepgan Abdumajit Toirov. 

Ushbu davrda kubok uchrashuvlari ikki mavsumda o'tkazilgan. Saralash, 1/16, 1/8 final uchrashuvlari 2001 yilning ikkinchi yarimida, chorak, yarim final esa 2002 yilning birinchi yarimida bo'lib o'tgan. Final bugungidek kuzning ajoyib oqshomida emas, yozning avgustiga belgilangan. "Paxtakor" finaldan oldingi finalda "Nasaf"ni osonlikcha chiqarib yuborgan bo'lsa, Sarkisyan shogirdlari qiyinchilik bilan "Qizilqum"dan ustun kelgan. 

Finalda esa gollar shousi ilk daqiqadanoq boshlanib ketgandi. G'olib esa ekstra-taymlarda aniqlangan. SHu kuni "Neftchi" safida 2 marotaba o'z darvozasini ishg'ol qilgan, Gochkuliev dubl qayd etgan. Tarkiblarga qarang, tarkiblarga. Qanday nomlar maydonga tushgan. 

2001/2002 yil

NEFTCHI - PAXTAKOR - 3:6 (Asosiy vaqt 3:3)

09.08.2002. Toshkent. «Paxtakor» Markaziy stadioni. 15000 tomoshabin.

Hakam: R. Saidov.

Gollar: Sergey Ni (14), Muxtor Qurbonov (85), Akmal Xolmatov (90) - Gochguli Gochguliev (4,115), Sergey Lebedev (5 o'z darvozasiga, 107 o'z darvozasiga), Leonid Koshelev (70), Zayniddin Tojiev (117).

"Neftchi": Georgiy Zabirov, Ravshan Mataliev, Hamidov (Soip Ahmedov 75), Abdumajit Toirov, Mansur Saidov (Nodir Usmonov 46), Muxtor Qurbonov, Sergey Lebedev, Akmal Xolmatov, Sergey Ni, Umid Isoqov (Rustam Do'rmonov 77), Anvar Berdiev.

"Paxtakor": Ignatiy Nesterov, Baxtiyor Ashurmatov, Gochguli Gochguliev, Qayrat O'taboev, Vitaliy Jalilov, Leonid Koshelev (Baxodir Seytkamolov 117), Vladislav Kiryan, Server Jeparov, Anvar Soliev, Aleksandr Geynrix (Zayniddin Tojiev 60), Nematullo Quttiboev (Temur Kapadze 73) .

Ogohlantirishlar: Mansur Saidov, Abdumajid Toirov, Georgiy Zabirov - Anvar Soliev.