Bekzod Qodirqulov: "Oy oxirida barcha bilan to'liq hisob-kitob qilinadi degan umiddamiz"

"Bugun qiyin o'yin bo'ldi. Ikkala jamoa ham o'tgan turlarda yutqazgandi va shu bois bugun g'alaba uchun maydonga tushishdi. Yigitlarga rahmat aytaman, ular oxirigacha kurashishdi. "Aral" asosan bo'ydor hujumchilarga uzun pas berish orqali o'ynashini bilardik, bunga tayyor edik. Tezkor gol ham bizga yordam berdi. Ketma-ket mag'lubiyatdan keyin bugungi g'alaba yigitlarga yaxshi kayfiyat olib keldi. Avvalo bu g'alabani sirdaryolik va yangierlik futbol muxlislariga bag'ishlaymiz", - deydi Bekzod Qodirqulov.

- "Yangier" bugun nimaning hisobiga g'alabaga erishdi?
- Bugun futbolchilarim oxirgi o'yinga chiqqandek o'ynashdi. Barcha o'yinchilarim bir jamoa bo'lib o'ynadi.

- "Yangier"ning hozirgi maqsadi qanday?
- "Yangier" doim o'z oldiga har bir bahsda g'alaba qozonish uchun o'ynaydi. Keyingi yilga tayyorgarlikni hozirdan boshladik. Yigitlar buni his qilib turishibdi.

- Klubning moliyaviy holati qanday?
- Barchasi joyida, oylik va maoshlar o'z vaqtida berib borilmoqda. Klubimiz rahbari Mahmud aka SHerqulovga rahmat aytaman. Har tomonlama yordam berib turibdilar. O'zlari vada bergandek oy oxirida barcha bilan to'liq hisob-kitob qilinadi degan umiddamiz.