Baxtiyor Ashurmatov: "Bu yilgi sharoitimizdan kelib chiqib 6-o'rinni olishni rejalashtirgandik"

- Bugun tengkuchli bo'lgan raqiblar o'rtasida o'yin bo'ldi. Har ikki jamoaga ham o'yindan oldin ochko juda zarur edi. O'yinni tengkurashlar ostida o'tdi degan bo'lardim. Faqatki Dinamo yaratilgan imkoniyatlarini golga aylantirib, g'alaba qozonishga erishdi. Raqib goli o'yin oxirida kiritilgani uchun bizda javob to'pini kiritish uchun deyarli vaqt qolmagandi. Omad raqiblarga kulib boqdi.

- Uchrashuvning birinchi bo'limida Alisher Mahmudovning jarohati bois majburiy o'zgarishga qo'l urdingiz. Bu o'zgarish jamoa o'yiniga salbiy tasir ko'rsatdimi?

- Birinchi bo'lim yakunidagi o'zgarishni ikkinchi bo'lim boshida qilishni rejalashtirayotgandim. CHunki biz mag'lubiyatga uchrayotgandik. SHu bois ikkita hujumchi bilan to'p surishni o'ylab, Ulug'bek Baqoevni maydonga tushirishni rejalashtirgandim. Aytmoqchimanki, majburiy o'zgarish o'yinimizga salbiy tasir qilgani yo'q.

- Jamoa mavsum yakunlariga ko'ra o'z oldiga qo'yilgan vazifani uddalay oladimi?

- Bu yilgi sharoitimizdan kelib chiqib 6-o'rinni olishni rejalashtirgandik. So'nggi ikki o'yindagi mag'lubiyat esa bu vazifani bajarishni mushkul ish qilib qo'ydi. Qolaversa, kuchli beshlikdan tashqarida qolgan jamoalar orasidagi ochkolar farqi katta emas. Biz har qanday holatda ham mavsum so'nggiga qadar bor kuch va imkoniyatimizni ishga solamiz.