"Bavariya"ni to'xtatish imkonsizmi?!

Ha, myunxenlik futbolchilar  bundesliganing boshqa  klublari bilan kechadigan o'yinlarda o'zlari istaganlaridek harakat qiladilar va uchrashuvlarda o'zlari istagan hisobda g'alaba qozonadilar. SHu boisdan ham Myunxen super-klubi deyarli har turda yangi-yangi rekord natijalarni qayd etayotir.

SHanba kungi g'alabadan so'ng turnir jadvali karvonboshiligini to'laligicha qo'lga olgan qizillar ketma-ket 38 o'yindirki mag'lubiyatga uchrayotganlari yo'q. Bunday natijani haligacha biror nemis klubi qayd etgan emas edi. Pep Gvardiola shogirdlari esa yangidan-yangi cho'qqilarni zabt etishni to'xtatmoqchi emaslar. "Borussiya" ustidan qozonilgan g'alabadan so'ng "Bavariya" o'z hisobidagi ochkolar sonini 35 taga etkazib oldi va bu ham yana bir yangi rekorddir. SHu paytgacha hech bir bundesliga klubi 13 turda 35 ochko yig'ishning uddasidan chiqmagan edi. Demak, qizillar bu borada ham etakchi ekanliklarini isbotlagandek…

Ko'rinib turibdi-ki, "Bavariya"ni to'xtatish oson ish emas. Ammo Germaniya bundesligasi kutilmagan sovg'alarga boy ekani bilan ajralib turadi. SHu sababdan uni kuzatishda davom etamiz. Balki keyingi turda "Bavariya"ning quruq seriyasi o'z intixosini topar…

Zoxirjon Akramxonov tayyorladi