Bahodir Ahmedov: “Eng muhimi Rustam Umarov ishonchli o'yin namoyish etmoqda”

Biz terma jamoamiz yordamchi murabbiyi, sobiq futzalchi Bahodir Ahmedovdan o'yindan so'ng intervyu oldik.

-  Avvalam bor bugungi g'alaba va JCH yo'llanmasi bilan tabriklayman. Iroq terma jamoasiga qarshi o'yin haqida fikrlaringiz.
-  Bugungi g'alaba va Jahon chempionati yo'llanmasi bilan barchangizni terma jamoamizni qo'llab – quvvatlab turgan muxlislarimizni tabriklayman. Juda ham og'ir o'yin bo'ldi, buning uchun futzalchilarimizga katta rahmat. Bugun yigitlarimiz so'nggi daqiqagacha bor kuchlari bilan raqibga qarshilik ko'rsatib yirik hisobda g'alaba qozonishdi.

-  Bugungi raqib terma jamoasi haqida qanday fikr bildirasiz?
-  Iroq terma jamoasi bizga qarshi juda kuchli o'yin namoyish etishdi. Men ularga keyingi o'yinlarda omad tilab qolaman. Oldinda turgan uchrashuvlarda so'nggi beshinchi yo'llanmani qo'lga kiritishsin.

-  Yarim finalda bizga Tailand terma jamoasi raqiblik qiladi. Ushbu o'yin oldidan qanday fikr bildirasiz?
-  Ushbu o'yinga bugundan boshlab tayyorgarlik ko'rishni boshlaymiz. Ertaga mashg'ulotimiz bor, Tailand terma jamoasini kuchli va zaif joylarini ko'rib ularga yarasha tayyorgarlik ko'ramiz.

-  Turnir boshlanganidan beri Rustam Umarov ajoyib o'yin ko'rsatib termamizga muhim bo'lgan g'alabalarga o'z hissasini qo'shdi. Posbonimiz Umarov Osiyo chempionatining “eng yaxshi darvozabon” nominaciyasida g'olib bo'lishi mumkinmi?
-  Men bunga bir narsa deya olmayman. OFK va terma jamoalar murabbiylari o'rtasida so'rovnoma o'tkaziladi, ushbu so'rovnomada kim g'olib chiqsa o'sha terma jamoa posboni eng yaxshi bo'ladi. Biz uchun eng muhimi Rustam Umarov ayni damda ishonchli o'yin namoyish etmoqda.
 

Jahongir Sotvoldiev suhbatlashdi.