Asror Aliqulov: "Qo'ldan kelgancha harakat qildik"

- O'yin haqida fikringiz?

- Tezkor gol o'tkazib yubordik. Bu ham o'yinimizga tasir qildi. Andijonda muxlislar katta kuch hisoblanadi. Buni o'yindan oldin futbolchilarga aytib, bosimga dosh berishimiz kerakligini aytgandik. O'tkazib yuborilgan goldan so'ng o'zimizga kelish qiyin bo'ldi. Bu o'yinga berilgan ko'rsatma g'alaba qozonish edi, chunki hozirgi holatda oldimizda bundan boshqa variant yo'q. Bugun uchta gol urib, to'rtta o'tkazdik. Hujumda rejamiz ish berdi-yu, ammo himoyada xatolar kuzatildi. Yo'qsa mag'lubiyatga uchramasdik. Mag'lubiyatga qaramasdan bugungi o'yin uchun futbolchilarimizga rahmat aytmoqchiman. Biz qo'ldan kelgancha harakat qildik. Muxlislarga yoqadigan futbol ko'rdik deb o'ylayman.

- Birinchi bo'limdayoq ikki nafar futbolchini almashtirdingiz. Bu himoyachilarning yaxshi o'yin ko'rsata olmagani bilan bog'liqmi?

- Almashtirilgan futbolchilar o'yin tezligiga kirishib keta olmadi. Birinchi gol o'ng qanotimizdan sodir bo'ldi. Hujumga chiqishda ham ishonch etishmadi. Ishonchni qaytarish uchun futbolchilarni almashtirdik.

- Abror Toshqo'ziev bilan Jasur Hakimov bugun zaxiradan maydonga tushirildi. 

-O'yinga belgilangan taktika hamda futbolchilarning jismoniy holatidan kelib chiqib ularni zaxirada qoldirdik. Abrorni qanotga tushirdik, Hakimov esa hujumga qo'shildi. Shundan so'ng ikki nafar hujumchi bilan o'ynay boshladik.

- "Sho'rtan" Superligada jon saqlab qola oladimi?

- Oradagi ochkolar farqi katta. Buning ustiga Superligada jamoalar darajasidan kelib chiqib aytadigan bo'lsam, bu juda qiyin bo'ladi. Ammo oldimizda boshqa yo'l yo'q. Har bir bahsga faqat g'alaba uchun chiqishdan boshqa choramiz yo'q. Bizga kuchli himoyachilar kerak, chunki katta kuch bo'lib oldinga o'tyapmiz va bu payt himoyada muammolar yuzaga kelyapti. Himoyamiz ochiq qolayotgani bois gollar o'tkazyapmiz.

- Penalti haqida fikringiz?

- Hakamlar VARga murojaat qilib yakuniy qarorni qabul qilishdi. Shuning uchun bu borada biron gap ayta olmayman.