Artur Gevorkyan: “Xato qilishga haqqimiz yo'q edi”

CHempionat bahslari davomida ham o'zining gollari va aniq to'p uzatishlari orqali jamoamizning g'alabalariga katta hissa qo'shib kelayotgan futbolchi uchrashuv haqidagi fikrlarini bildirib o'tdi.

-Kechagi o'yinda ilk marotaba stadionimiz muxlislar bilan to'lib toshdi. Bu mavsumda birinchi marotaba bunday holat ro'y berishi edi. SHuning o'ziyoq ushbu uchrashuvning ahamiyati yuqori ekanligidan dalolat beradi. O'z navbatida muxlislarimiz bizni butun uchrashuv davomida fantastik tarzda qo'llab-quvvatlab turishdi. Bu ham g'alaba qozonishimizda muhim rol o'ynadi, desam mubolag'a bo'lmaydi. Stadion to'la ishqibozlar ko'z o'ngida to'p surish albatta yoqimli... Uchrashuv juda keskin va murosasiz kechdi. Har ikkala jamoa ham finalga loyiq edi. Lekin biz yaratilgan imkoniyatlardan samaraliroq foydalandik va final yo'llanmasiga ega chiqdik.

-O'yin davomida ikki marotaba penalti tepish uchun “nuqta”ga yaqinlashdingiz. O'sha paytda hayajon bo'lmadimi?
-Bo'ldi, albatta. Lekin ikki safar ham darvozabonni chalg'ita oldim. Omad biz tomonda bo'ldi. Umuman olganda bu o'yinda xato qilishga haqqimiz yo'q edi. Umid qilamanki, keyingi uchrashuvlarda ham muxlislarimiz stadionni to'ldirib, bizga ruhan dalda bo'lishadi. Biz esa ularga xursandchilik ulashish uchun bor imkoniyatimizni ishga solamiz.


A.NURIY suhbatlashdi.