Anzur Ismoilov 60ta o'yin o'tkazganligi uchun taqdirlandi

O'shanda u Aleksey Nikolaevni o'rniga maydonga tushgan. Himoyachining o'yinidan qoniqish hosil qilgan murabbiylar shtabi, unga 3 kundan keyin Janubiy Koreyaga qarshi bo'lib o'tgan bahsda asosiy tarkibdan joy beradilar.

U 12 o'yiniga kelibgina birinchi sariq kartochkasini olgan. Terma jamoadagi birinchi golini esa 2013 yil Iordaniyaga urgan edi. Statistika bizga turli qiziqarli malumotlarni taqdim etadi, Iordaniyaga qarshi o'yinda futbolchi o'zining yubiley, 60 o'yinini o'tkazdi.




Barchasi ajoyib o'tdi, bundan futbolchilar ham xursand bo'ldilar.


Terma jamoamiz bosh murabbiyi Mirjalol Qosimov bilan kelishgan holda, bundan keyin terma jamoada yubiley o'yinini o'tkazib kelayotgan futbolchilarni turli ko'rinishda taqdirlab boramiz. Hozircha 50ta va undan ko'p o'yinda maydonga tushgan futbolchilarni taqdirlaymiz. O'sib kelayotgan keying avlodga o'rnak bo'lsin deya boshlanayotgan ishimiz hali ommaviy bo'lib ketishiga ishonamiz. Ayni paytga kelib 17 nafar futbolchi terma jamoamiz sharafini 50tadan ortiq o'yinda himoya qilganlar.

Terma jamoada eng ko'p o'ynagan futbolchi bu Temur Kapadze 114ta! Kapadze Osiyo chempionatida o'zining 120 o'yinini o'tkazishi mumkin. Undan keyin Server Jeparov turibdi. Joriy yilning 5 mart kuni BAA bilan bo'lib o'tgan o'yinda sardorimiz 100 o'yinini o'tkazdi. Hozirda o'yinlar soni 104taga etib ulgurdi.
Uchinchi o'rinda, faxriylar safiga kirib ulgurgan posbonimiz, Ignatiy Nesterov 86ta! 90taga 4ta qoldi. Undan keyingi o'rinda turgan Aleksandr Geynrix hisobida 84ta o'yin mavjud. Beshinchi pog'onadan
Mirjalol Qosimov o'rin olgan, 67ta o'yin. Andrey Fyodrovda 65ta o'yin, Nikolay SHirshov va Asror Aliqulovda 63tadan. Odil Ahmedov va Maksish SHackix kuchli 10likni yopib berishadi, ularning hisobida 62 va 61tadan o'yin bor. Avvallari o'rtoqlik o'yinlarini juda kam bo'lganligini inobatga olsak, futbolchilik faoliyatini tugatgan o'yinchilarimiz uchun bu natija chakki emas.




Mahsus sovrnini topshirish jarayoni, sal avval men terma jamoa gvardiyachilarining statistikasini o'qib eshittirdim.


Mirjalol Qosimov bilan kelishgan holatda, 23 dekabr kuni Anzur Ismoilovga bag'ishlab, kichik dastur rejasini tuzib chiqdik. Unga ko'ra men va terma jamoamiz operatori  Jamoliddin Solixov sport do'konidan esdalik sovg'asini oldik.

Iordaniya bilan bo'lib o'tgan uchrashuvdan keyin o'yini 50taga etgan gvardiyachilar quyidagicha ko'rinish oldi:

Futbolchi	Tug'ilgan yili	O'yin	Daqiqa
Timur KAPADZE	05.09.1981	114	8464
Server JEPAROV	03.10.1982	104	8118
Ignatiy NESTEROV	20.06.1983	86	7435
Aleksandr GEYNRIX	06.10.1984	84	4938
Mirjalol QOSIMOV	17.09.1970	67	5112
Andrey FYODOROV	10.04.1971	65	5736
Asror ALIQULOV	12.09.1978	63	5306
Nikolay SHIRSHOV	22.06.1974	63	4818
Odil AHMEDOV	27.11.1987	62	5189
Viktor KARPENKO	07.09.1977	61	3996
Maksim SHACKIX	30.08.1978	61	4824
Anzur ISMOILOV	21.04.1985	60	4557
Aziz HAYDAROV	08.07.1985	58	4439
Baxtiyor ASHURMATOV	25.03.1976	54	4353
Ulug'bek BOQOEV	28.11.1978	53	2702
Fevzi DAVLETOV	20.09.1972	52	4132
Aleksandr XVOSTUNOV	09.01.1974	50	3980

50talikka yaqinlashib qolgan futbolchilar

Vitaliy DENISOV	23.02.1987	49	3795
Jasur HASANOV	02.08.1983	40	2572
Islom To'xtaxo'jaev	30.10.1989	39	2999
Sanjar TURSUNOV	29.12.1986	38	2495
SHavkat MULLAJONOV	19.01.1986	28	1941

Bundan buyon terma jamoamizda yubiley raqamlarni zabt etayotgan futbolchilarni shu tarzda taqdirlab borishni maqsad qildik. Agar bunga rasmiy ko'rinish bersak yanada jiddiyroq bo'lar edi. Aslida bu narsalar biz, jurnalistlarning zimmasidagi ish. Mana sekin boshlab ham yubordik.




Bu Anzurga "CA"ning sovg'asi ))

“Iordaniya bilan o'yin Anzurning faoliyatidagi 60chisi bo'ldi. Bunday natijaga erishish oson emas Umuman olganda shu zalga yig'ilib o'tirgan ekansizlar, demak sizlar ham mehnat qilgansiz. U yanada davomli bo'lib, mana shunday natijalarga erishish uchun ko'p ishlash kerak. hayotingizni futbol bilan bog'ladingizmi, demak unga beetibor bo'lmang. Agar yaxshi ishlashda davom etsangiz, mana Kapadzega o'xshaysiz yoki Jeparovga. Bu ikkisi allaqachon yuzlik marrasini zabt etib bo'ldi. Ular bu natijaga bir yil deganda emas, yillar davomida qilingan mehnatlar evaziga erishdilar. Anzur, men senga keyingi faoliyatingga omad tilagan holda, yillar o'tib murabbiylik sohasida ham muvaffaqiyatlarga erishishinga tilakdoshmiz”, - deydi Mirjalol Qosimov kechki mashg'ulotlardan so'ng tashkil etilgan tadbirchada.

Har qanday kishini qilayotgan ishidan kelib chiqib uni rag'batlantiring, u million-million pul turadigan sovg'a bo'lishi shart emas. Oddiygina oq-qora printerdan chiqqan varaqni ramkaga solsangiz ham bo'laveradi, muhimi etibor. Kishi o'zi qilayotgan mehnatini besamar ketmayotganligini xis qilsa, o'z ustida ikki karra ishlaydi, yangi yutuqlarni qo'lga kiritish va eng muhimi uni qadrlayotgan vataniga bo'lgan muhabbati jo'sh urib, ishida unum bo'lishi tayin.

Nodirxo'ja Yuldashev