“Andijon”ning tayyorgarligi davom etmoqda

15-dan 29 dekabrga qadar mo'lajallangan ushbu yig'inning ikkinchi haftasi ham boshlandi. Mashg'ulotlar SHo'rbuloq dahasidagi ixtisoslashtirilgan futbol maktabi internatining suniy qoplamali maydonida olib borilyapti. SHuningdek, futbolchilar har ikki kunda bir trenajyor zalida ham shug'ullanishmoqda.

“Andijon” bosh murabbiyi Edgar Gess Germaniyaga ketganini xabar qilgandik. SHu bois birinchi yig'in uning yordamchilari boshchiligida o'tmoqda. Gessning yordamchisi Oleg Tyulkin 22 va 23 dekabr kunlari Toshkentda tashkil etilgan murabbiylar seminarida ishtirok etib qaytdi. Bu paytda mashg'ulotlarni Vitaliy Legay, Qahramon Abduqodirov va Server Esetov o'tkazishdi. Tarkib haqida gapiradigan bo'lsak, bu yil “Andijon” sharafini himoya qilgan mahalliy futbolchilarning deyarli barchasi mashg'ulotlarda qatnashmoqda. Birgina Bahrom Abdurahimov betobligi bois yig'inda ishtirok etmayapti.

O'tgan hafta tarkibda ko'rinmagan jamoaning tajribali himoyachisi Rahim Qodirov seshanba kuni safga qaytdi. Yangi o'yinchilardan darvozabon Eldor Isaboev ushbu haftadan mashg'ulotlarda ishtirok etmoqda. O'tgan yili birinchi liga jamoalarida faoliyat olib borgan Isaboev hozircha ko'rikdan o'tmoqda.

SHuningdek, o'z vaqtida “Andijon”ning asosiy va yoshlar jamoalarida o'ynagan Isroil Tursunov, Lochin Dolimov, Dilmurod Mamayusupov, Jasur Yo'ldoshev, SHoyad Mullajonov kabi futbolchilar bundan tashqari Vitaliy Zoteev, Rinat Muslimov va Akmal Ergashev ham mashg'ulotlarda qatnashishmoqda. Bu futbolchilarning taqdiri qanday kechishi hozircha malum emas.