Andijon: Cementchi bilan o'yinga tayyorgarlik boshlandi

Endi navbatdagi turdagi raqibimiz - Quvasoyning Cementchi jamoasidir. Abdumalik Hakimov boshchiligidagi ushbu jamoa ayni damda turnir jadvalida peshqadamlik qilmoqda. Andijon bilan o'rtadagi ochkolar farqi ikkitani tashkil etayotganini ham aytish lozim. Quvasoyliklar bugungacha 5ta o'yin o'tkazib  yuz foizli natija ko'rsatib kelmoqda. SHu bois aytish mumkinki, 26  aprel kuni Quvasoyda bo'lib o'tadigan Cementchi - Andijon uchrashuvi keskin va murosasiz tarzda o'tishi turgan gap. Burgutlar ustozi Vitaliy Legay kechagi o'yindan so'ng futbolchilarga dam bermadi va navbatdagi muhim bellashuvga tayyorgarlikka kirishildi.

 Bugun ertalab o'tkazilgan mashg'ulotda murabbiylar ayrim futbolchilar bilan tiklanish mashg'ulotini olib borgan bo'lsa, qolganlar to'liq kuch bilan astoydil shug'ullandi. Tarkibda Abdukarim Muhamedovdan boshqa yo'qotishlar yo'q. Iqtidorli posbon UzDongJu bilan o'yindan oldingi mashg'ulotda kutilmaganda oyog'idan jaroxat olib, bir necha oyga safdan chiqdi. Qolgan futbolchilarimiz soppa-sog' va ular bo'lajak jiddiy o'yinga jangavor tayyorgarlik va yuqori kayfiyatda deyish mumkin.

Eslatib o'tamiz, birinchi liganing ushbu markaziy uchrashuvi 26 aprel, chorshanba kuni Quvasoy shahridagi Cementchi stadionida soat 16:30da boshlanadi. Ishqibozlarimizni qiziqarli kechishi kutilayotgan o'yinga taklif etib qolamiz. Zero, Cementchiga qarshi uchrashuvda muxlislar daldasi jamoamiz uchun muhimdir. SHunday ekan, biz sizlarni stadionda kutamiz!

"Andijon" klubi matbuot xizmati