Alibobo Rahmatullaev "Paxtakor" futbolchisiga aylandi

2014 yilgi mavsumni "Bunyodkor"da o'tkazgan yarim himoyachi endi "Paxtakor" sharafini himoya qiladi. Sobiq jamoasi tarkibida oliy ligada 32 uchrashuvda 1 to'p kiritgan Rahmatullaev o'z mahoratini "sherlar" safida ko'rsatishga harakat qiladi.


Rahmatullaevning o'tishi to'g'risida "Paxtakor" menejeri Samvel Babayan quyidagilarni takidlab o'tdi:
- Aslida Alibobo bilan 2012 yilda shartnoma tuzgandik. O'shanda u "Bunyodkor" tarbiyalanuvchisi sanalgani sababli jamoaga qaytishga ruxsat berish haqida iltimos qildi. Biz uning iltimosini qabul qildik. CHunki o'yinchini uning xohishi bo'lmagan taqdirda ushlab turishdan foyda yo'q. Menimcha, Rahmatullaev "Bunyodkor"da 2 yil vaqtni boy berdi. Futbolchi sifatida o'sish uchun etarlicha o'yin amaliyotiga ega bo'lgani yo'q. Biz uning o'yinlarini ko'pdan beri kuzatib kelamiz. "Paxtakor" safida bor iqtidorini namoyish etishi uchun to'g'ri yo'nalish berishga harakat qilamiz va unga imkoniyat beramiz.

Futbolchi o'zining o'tishi xususida shunday fikr bildirdi:
- "Paxtakor"ga o'tish men uchun yangi va katta sinov. Yoshligimdan otam meni ushbu jamoa o'yinlarini ko'rish uchun stadionga olib kelardi. Aytishim mumkinki, bolaligimdan niyat qilgan orzu amalga oshdi. Bundan juda xursandman. 2012 yil yuz bergan holatni yaxshi eslayman. O'shanda hali yoshroq edim va bir necha tezkor qarorlar qabul qilishimga to'g'ri kelgan. O'tishim ro'y bermaganda otam mendan xafa bo'lgandi. Endi uning ham orzusi ushaldi. "Paxtakor" menejeriga menga ishonch bildirgani uchun rahmat aytaman. Yaxshi o'yinlar ko'rsatib, jamoa g'alabalariga hissa qo'shishga harakat qilaman.