Ali Abdurahmonov: "Bosh murabbiyimiz taqdim etgan imkoniyatdan maksimal foydalanishga harakat qilaman"

- Bugungi bahs haqidagi fikrlaringiz bilan bo'lishsangiz...

- Jamoalar hali tayyor emas va shu sababli qiyin bahs bo'ldi. Jamoalar yaxshi holatga kelib olish uchun bir muddat vaqt kerak bo'ladi. Muhimi, g'alaba qozondik va dastlabki uch ochkoni qo'lga kiritdik. Muxlislarimizni g'alaba bilan tabriklayman.

- So'nggi daqiqalarda g'alaba golini kiritdingiz. Dastlabki bahsdan hissiyotlaringiz qanday?

- Juda yoqimli holat. Bosh murabbiyimiz Mirjalol Qosimov futboldagi hissiyotlarini pul bilan ham sotib olib bo'lmaydi deb aytib keladilar. Bugun shunday holat bo'ldi.

- OKMK jamoasining yangi mavsumdagi maqsadlari qanday?

- Yangi mavsumga tayyorgarlik jarayoni juda ajoyib kechdi. Dastlab BAAda keyin esa Turkiyada yig'in o'tkazdik. Ko'p bahslarda ishtirok etdik. Jamoa ancha yoshardi, endi yoshlarga yanada ko'proq imkoniyat beriladi. Bundan juda ham xursandman. OKMK jamoasi yosh futbolchilarning rivojlanishi uchun intilmoqda va barcha imkoniyatlarni taqdim etmoqda. Tarkibimiz kuchaydi deb ayta olaman. Biz legionerlar va yosh futbolchilarni o'z safimizga qo'shib oldik. Chempionat bahslarida o'z oldimizga yuqori maqsadlarni qo'yganmiz.

- O'yin so'ngida 10-15 daqiqaga maydonga tushdingiz va g'alaba golini kiritdingiz. Yangi mavsumda o'z oldingizga nechta gol urishni maqsad qilgansiz?

- Qancha ko'p gol ursam, shuncha yaxshi. Bosh murabbiyimiz qancha imkoniyat beradi bilmadim, ammo imkoniyatdan maksimal darajada foydalanish va jamoamga foyda keltirishni maqsad qilganman. Nasib qilganicha gol uramiz.