Aleksandr Mochinov "Bunyodkor"dan ketadi...mi?

Deyarli har kuni nazorat-sinov uchrashuvlari o'tkazilmoqda. O'yinlarni tomosha qilish uchun kelganlar orasida taniqli mutaxassislar, klub rahbarlari, futbolchilar va OAV vakillarini uchratishimiz mumkin.

Kuni kecha "Oq-tepa" stadionida oliy liga vakillari "Olmaliq" va "Neftchi" jamoalari o'rtasidagi uchrashuv bo'lib o'tdi. O'yinni tomosha qilish uchun juda ko'plab insonlar tashrif buyurdi. Bahsni kuzatish jarayonida ko'zimiz "Bunyodkor" yoshlar jamoasi ustozi Aleksandr Mochinov va birinchi liganing etakchi klublaridan biri rahbarining suhbatiga tushdi. Kuzatishimizcha, ushbu suhbat jarayonida muzokara davom etdi. Yani o'sha klub xo'jayini aynan Mochinovning xizmati orqali jamoasini oliy ligaga olib chiqmoqchi ekanligini aytdi.

Yaqinda Aleksandr Mochinovga Namanganning "Navbahor" jamoasidan taklif tushgani va murabbiy namanganliklar bilan muzokara olib borgani haqida eshitgandik. Ammo yakunda "Navbahor" mutasaddilari Baxtiyor Ashurmatov variantida to'xtashdi.

Aleksandr Mochinov o'tgan mavsumda 1994-1995 yillarda tavallud topgan yoshlardan iborat jamoa tuzib, aynan ular bilan O'zbekiston yoshlar ligasi g'olibligini qo'lga kiritgan edi. Mavsumlar oralig'idagi yig'inlarda o'z shogirdlari bilan ketma-ket nazorat uchrashuvlari o'tkazib, qator yirik hisobdagi g'alabalarni qo'lga kirtmoqda. U so'nggi yillarda o'z ustida tinimsiz ishlashi bilan nom qozondi. "Bunyodkor" yoshlarining o'yinida ham aynan uning chizgilarini ko'rish mumkin. Aleksandr Mochinovga bo'lgan qiziqish klublarda mavsum sayin ortib bormoqda. Darvoqe, Aleksandr Mochinov ayni damda yurtimizdagi eng yosh Pro licenziyasiga ega bo'lgan murabbiy hisoblanadi.

U "Bunyodkor" jamoasidagi faoliyatini davom ettiradimi yoki birinchi liga jamoasini boshqaradimi buni malum vaqtdan keyin bilib olamiz.