Akbar To'raev: "CHiroyli gollar o'tkazib yuborish bo'yicha yaqinda "xit-parad"larga kirsam kerak"

Malum vaqt o'z postini jamoadoshi Murod Zuhurovga berib qo'ygan Akbar To'raevdan uchrashuv haqida, jamoadoshi Murod Zuhurov bilan yuzaga kelgan raqobat va "Bunyodkor"ning "Paxtakor"ga qarshi bo'lajak o'yini borasida so'radik.

"Qiziqarli o'yin bo'ldi. Uchrashuvda asosan biz ustunlik qildik. Bahs davomida to'pni asosan biz nazorat qildik. Bu bellashuvda jamoalar o'rtasidagi tafovut, futbolchilarning mahorati yaqqol bilindi. Bizning futbolchilar mahorat bobida "Qizilqum" azolaridan kuchliligi sezildi. O'tkazib yuborilgan gol? O'sha vaziyatni zarba berilishini kutgandim, biroq to'pning bu tarzda yo'naltirishini kutmagandim. Menimcha, chiroyli gollar o'tkazib yuborish bo'yicha yaqinda xit-paradlaga tushsam kerak. Birinchi davrada jarohat olgandim. Ayni paytda jarohatdan forig' bo'ldim, Xudoga shukur. Bu orada Murod akam Zuhurov juda ishonchli tarzda darvozani qo'riqladilar. Bizlarda sog'lom raqobat vujudga kelgan. Men bunga yaxshi qarayman, to'g'ri tushunaman. Kim kuchli bo'lsa murabbiy o'shani tarkibga kiritadi. "Paxtakor" bilan bo'ladigan o'yin? "Qizilqum" bilan bo'lgan o'yin hoziroq unutildi. Endi barcha o'y-hayollar "Paxtakor"ga qarshi kechadigan bahsga qaratiladi. Men jamoamizga ishonaman. Xudo xohlasa, "Paxtakor" to'sig'idan o'tib finalga yo'l olamiz. Ertadan boshlab ushbu bellashuvga tayyorgarlik ko'ramiz. Umid qilamanki, finalda biz o'ynaymiz. Javlon Ibrohimovning jarohat olganligi jamoa uchun katta yo'qotish deb o'ylayman. Ibrohimov ko'p yildan buyon jamoamizning etakchi futbolchisi sanaladi. Tayanch yarim himoya chizig'imizning haqiqiy etakchisi Ibrohimov hisoblanadi. Endi uning o'rnini Sardor Sobirxo'jaev va Dilshod Jo'raev singari futbolchilarimiz to'ldira olishadi", - deydi Akbar To'raev.