Aybek Nurboev: “SHartnomaga qadar hammasi yaxshi edi. Biroq...”

- Aybek aka, “Buxoro”dan ketishingizni qanday izohlaysiz?

- Bilasizmi shartnomaga qadar hammasi yaxshi kechayotgandi. Rahbariyat va bosh murabbiy bilan munosabatim juda iliq edi. Biroq bitim imzolanadigan paytga kelganda, voqealar rivoji tubdan o'zgarib ketdi. Ochig'i bunday bo'lishini o'zim ham sira kutmagandim. CHunki bu yil ham “Buxoro” qolishni rejalashtirgandim. Ammo bu xayot. Unda shunday kutilmagan xodislar uchrab turadi. Buni to'g'ri qabul qildim.

- So'nggi lahzada murabbiy bilan chiqisha olmadingizmi yoki rahbariyat bilan moddiy jihatni kelisha olmadingizmi?

- Moddiy tomondan. Kimdir men haqimda salbiy fikr bildirib, rahbariyatni chalg'itgan.

- Aniq nomni ayta olasizmi?

- Yo'q. Lekin o'zim uchun bilib qo'ydim.

- Ketish oldidan Aleksandr Mochinov bilan gaplashdingizmi?

- Aleksandr Vladimirovich klubga kelib, ish boshlagan kunlaridayoq men bilan hamkorlik qilishni istayotganini bildirgandi. SHuning uchun ham bu yil “Buxoro”da qolmoqchi edim. Yuqorida aytib o'tganimdek, bitta shaxs men haqimda ularga boshqacha tushuntirgan.

- SHundan so'ng sizni sobiq jamoangiz “Neftchi”ga o'tganingiz haqida eshitdik. SHu rostmi?

- Ha, shunday. 18 yanvardan farg'onaliklarning poytaxtdagi yig'iniga kelib qo'shildim. Lekin hozircha rasman kelishuvga erishmadik.

- Bu klubga sizni kim taklif etdi. Rahbariyatmi yoki murabbiy?

- Umuman olganda hammasi jamoaga qaytishimni istadi. O'zim ham sobiq jamoamni sog'indim shekilli, taklifni qabul qilib mashg'ulotlarga qo'shildim (kuladi).

- Oldingizda bundan boshqa variantlar ham bormidi?

- Ha, hozirgacha yana ayrim klublar chaqirmoqda.

- “Neftchi”da qolishingiz necha foizga aniq?

- Bu masala yaqin 2-3 kunda aniq bo'ladi.

 

Islombek Rustambekov.