"Ahvolimiz yaxshi, faqat cho'kyapmiz..."

Musobaqalar yakuniga qadar 10 kun bor, biroq bizni asosiy umidlarimiz sifatida ko'rilgan boks terma jamoamizning to'rt nafari musobaqa bilan xayrlashib bo'ldi. Musobaqalarning ilk davrasidan so'ng Sanjar Tursunov va Miraziz Mirzahalilov turnirni tark etgan bo'lsa, Fanat Qahramonov va Dilshodbek Ro'zmetov ikkinchi davradan so'ng turnir bilan xayrlashdi. Barcha Tokioda Riodagi natijalarni takrorlashimiz qiyinligi haqida aytishgandi, biroq bu darajada yomon natija bo'lishini hech kim kutmagandi.

Nega bunday bo'lmoqda?

1. Jismoniy holat yaxshi emasligi:

 O'zbek bokschilarining janglaridan ko'rib turibdiki, bokschilarimizning jismoniy holati mukammal holatda emas. Buni Fanat Qahramonov, Sanjar Tursunovda yaqqol ko'rinmoqda. Jangning dastlabki raundlaridan so'ng "o'chib" qolishmoqda.

2. O'quv-yig'in mashg'ulotlar haddan tashqari ko'payib ketgani.

Qozog'iston terma jamoasi sobiq bosh murabbiyi Tursingali Edilov qozoqlarning omadsizlariga asosiy sabab sifatida haddan tashqari ortiqcha o'quv-yig'in mashg'ulotlar ekanligini aytgandi. Bu holat bizda ham sodir bo'ldi. Bitta mashg'ulotdan so'ng, keyingisi boshlandi, keyin yana... Bu holat sportchilarni zeriktirib qo'yishi aniq. 

Sportchilarimiz yakka tartibda ham shug'ullanib turishlari lozim edi deb o'ylayman...

3. Tarkibni tanlashdagi xatoliklar: 

Ko'pchilik tanqid qilgan vaznlar: -75, -63, -91 kg vaznlar avvaldan tahmin qilinganidek o'zlariga berilgan imkoniyatdan foydalana olishmadi. To'lqin Qilichevga bu borada juda ko'p savollar berildi. Uning javobi bitta: Ularning reytingi baland va shu sababli qura ularga omadli keladi degandi. SHu o'rindda ikkita savol tug'iladi! Agar boshqa bokschilarga imkon bermasa, qanday qilib reyting ochko to'plashadi? Keyin reytingi baland deb olib ketilgan bokschilarimiz, baribir ilk davralardan kuchli bokschilarga tushib qoldiku!

4. Ruhiy tomondan yaxshi tayyorlanmaganligi:

Hozirgi davrda psixolig atamasi sportda juda muhim hisoblanadi. Barcha tashkilotlarda shunday lavozim joriy etilgan. Biroq boks terma jamoasining shaxsiy psixoligi yo'q! Qanday qilib? 

Terma jamoamiz murabbiylaridan biri Farrux Qilichev Dilshodbek Ro'zmetovning mag'lubiyatiga asosiy sabablaridan biri bokschimizning birinchi raunddan so'ng ruhiy ahvoli yomonlashgani va shu sababli jangning qolgan qismida yaxshi harakat qilmaganini aytdi. SHuncha shtabga joy topilganida, psixologga joy topilmasligi g'alatiroq... Murabbiylarga bu haqida ham savol berilgandi. Javob oddiy! Hech bir psixolig murabbiydan yaxshiroq ruhiyatini ko'tara olmaydi. Lekin u zamonlar o'tib ketgandek. Rivojlanishni istasak, yangiliklar qilishdan qo'rqmaslik kerak.

5. Sportchilarimiz haddan tashqari o'zlariga ishonib yuborishdi

Bu ham bir katta sabab. So'nggi yildagi omadli yurishlaridan so'ng bokschilarimiz o'zlarini engilmasdek his qilishni boshlashdi, nazarimda. O'ziga ishonish yaxshi, biroq raqibni mensimaslik yomon oqibatlarga olib kelishi mumkin. Fanat Qahramonov bugungi jangda o'ziga haddan tashqari ishonib yubordi va qo'lini tushirib jang qildi. Oqibatda esa...

Nima bo'lgan taqdirda ham terma jamoamizga oxirga qadar ishonishda davom etamiz!