AGMK futbolchilari Olmaliq shahridagi 80-sonli ixtisoslashtirilgan maktab internati mehmoni bo'ldi FOTOGALEREYA

Tadbirda “Olmaliq KMK” AJ rahbariyati, kasaba uyushmasi kengashi, shahar Yoshlar ittifoqi va “Olmaliq KMK” AJ Yoshlar ittifoqining faollari hamda AGMK futbol klubining bir guruh charm to'p ustalari ishtirok etishdi. Tadbirni “Olmaliq KMK” AJ boshqaruv raisining ijtimoiy masalalar bo'yicha o'rinbosari Ulug'bek Fayazov, boshqaruv raisining xodimlar bo'yicha o'rinbosari Azim Mirzadjanovlar ochib berishdi. Ular o'z nutqida mamlakatimizda nogironligi bo'lgan shaxslarga jamiyatning teng huquqli vakili sifatida munosabat bilan yondashilayotganini, buning natijasida Paraolimpiada musobaqalari, xalqaro tadbirlarda nogironlar olamshumul natijalarni qo'lga kiritib kelayotganini mamnuniyat bilan bildirdilar.

80-sonli maktab o'quvchilaridan iborat mini futbol jamoasi 2018-yilgi birinchilikda O'zbekiston chempionligini qo'lga kiritdi. AGMK professional klubi futbolchilari hamda kombinat rahbariyati tomonidan g'olib o'quvchilarga chempionlik medallari va faxriy yorliqlar topshirildi. “Metallurg” madaniyat saroyi ijodiy jamoalari tomonidan taqdim etilgan rango-rang koncert dasturi ham tadbirga o'zgacha fayz kiritdi.

AGMK futbol klubi matbuot kotibi Baxtiyor SHirinov, jamoa himoyachisi Vladislav Kasminin va yarim himoyachisi Zoxir Pirimovlar o'quvchilar tomonidan berilgan savollarga javob berib o'tishdi. Maktab internati sport bazasini mustahkamlash yuzasidan bildirilgan takliflar tadbir mehmonlari tomonidan maqullandi.

Maktab internatining mo'jaz sport zalida “AGMK” va O'zbekiston chempioni 80-maktab o'quvchilari o'rtasida mini futbol bo'yicha uchrashuv o'tkazildi. Qizg'in o'tgan bellashuvda ixtisoslashtirilgan maktab internati jamoasi g'alaba qozondi. Uchrashuv so'ngida tadbir mehmonlari tomonidan o'quvchi yoshlarga sport anjomlari tuhfa etildi.