afcasiancup.com: Ular qanday chiqishdi? O'zbekiston

Malumot uchun:
O'zbekiston milliy terma jamoasi
Qita chempionatlaridagi ishtiroki: 5 (1996, 2000, 2004, 2007, 2011)
Eng yaxshi ko'rsatkich: 4-o'rin (2011)
O'yinlari soni: 20 (9 g'alaba, 3 durang, 8 mag'lubiyat)

O'zbekiston terma jamoasi shu paytgacha besh marta Osiyo Kubogida qatnashgan bo'lib, eng yaxshi ko'rsatkichga 2011 yil Qatarda o'tkazilgan musobaqada erishgan. O'shanda jamoa uchinchi o'rin uchun kechgan bellashuvda Janubiy Koreyaga 2:3 hisobida mag'lub bo'lib, yakunda to'rtinchi o'rin bilan kifoyalangandi.

Oradan vaqt o'tib navbatdagi qita birinchiligi saralash bosqichini ijobiy o'tkazgan O'zbekiston termasi yana Osiyo chempionatiga yo'l oldi. Saralashdagi dastlabki bahsni o'z maydonida Gonkongga qarshi o'tkazgan jamoa 0:0 o'ynadi. Keyin esa safarda BAA bilan kechgan bahsda 1:2 hisobida imkoniyat boy berildi. O'yinda o'zbekistonliklardan SHohrux Gadoev gol urgandi.

Keyingi uchrashuvlarga kelib O'zbekiston g'alaba nashidasini surdi: Vetnam 3:1 hisobida dog'da qoldirildi. Sardor Rashidov bilan Igor Sergeev bittadan to'p kiritgan bo'lsa, yana bir golni vetnamliklar himoyachisi o'z darvozasiga kiritib qo'ydi. Javob bellashuvida esa 3:0 hisobi qayd etildi. Yana Rashidov bilan Sergeev, shuningdek Vohid SHodiev o'zini ko'rsatdi.

Undan keyingi bellashuv Gonkong bilan o'tkazildi va bunda 2:0 hisobidagi g'alaba qo'lga kiritildi. Bu uchrashuvda Vohid SHodiev bilan Odil Ahmedov gol mualliflari bo'lishdi.

Nihoyat guruhdagi oxirgi o'yinni o'z maydonida BAAga qarshi o'tkazgan O'zbekiston 1:1 hisobida durang qayd etdi. Igor Sergeev tomonidan kiritilgan gol o'zbeklarga ketma-ket oltinchi marta Osiyo chempionatida qatnashish eshigini ochdi.

Jamoa Avstraliyadagi qita birinchiligida "V" guruhida Saudiya Arabistoni, Xitoy va KXDRga qarshi bahs olib boradi.