Abduqahhor Marufaliev: "CHempionlik uchun "Neksiya" berishgandi"

Ayni kez chempion tarkibdan joy olgan futbolchilar "Namangan" mehmonxonasida bo'lib turishibdi. Fursatdan foydalanib, biz chempion jamoa yarim himoyachisi Abduqahhor Marufalievdan intervyu oldik.

- Abduqahhor aka, bayram tadbiri oldidan taassurotlar qanday? Ayni kez nimalar haqida o'ylayapsiz?
- Birinchi galda ushbu shou uchrashuvini tashkil qilgan insonlarga, Namangan viloyat futbol federaciyasi, "Navbahor" klubi rahbariyatiga minnatdorchilik bildirmoqchiman. Taklif qilishganida bundan juda ham xursand bo'ldim. Bilasizmi, hozir o'zimni xuddi 20 yil oldingi davrga tushib qolgandek xis qilyapman. Jamoadosh do'stlarim bilan uchrashdik. Ayrimlari bilan bundan 20 yil oldin ko'rishgandik. Ular bilan dildan suhbatlashdik. Hozir qaerda ishlayotganimiz, nimalar bilan mashg'ul ekanimiz, oila azolarimiz haqida fikr almashdik.

- O'sha 20 yil avvalgi g'alabaning asosiy omili nima edi?
- Menimcha, jamoadagi futbolchilar, murabbiylar shtabi juda ham ahil va inoq bo'lgan. Bir-birimizni hurmat qilardik. Keyin o'sha paytdagi O'zbekistonning eng kuchli futbolchilari jam bo'lgandi. G'alabaga chanqoq bo'lganmiz.

- "Navbahor" safiga qo'shilishingiz qanday ro'y bergan?
- Jamoa bosh murabbiyi Viktor Jalilov va o'sha paytda klub mamuri bo'lgan Samvel Babayanning taklifi bilan "Navbahor" safiga qo'shilganman. Afsuski, chempionati startida "Traktor" klubiga qarshi kechgan uchrashuvda jarohat olib, 5-6ta o'yinni o'tkazib yuborishimga to'g'ri kelgandi. Adashmasam, o'sha chempionlik mavsumida 19ta uchrashuvda maydonga tushib, 6ta gol kiritgandim. CHempionlik uchun mavsum avvalida vada qilingan "Neksiya" avtomobili bilan taqdirlangandik.

Kamoliddin Alimov