Abdesammad Muhammad: "Franciya o'z tarixida birinchi marotaba mundialda ishtirok etmoqda, ammo bizda qo'rquv yo'q"

"Tailand kuchli jamoa ekanligini bilardik. Bugun raqibimiz yaxshi o'yin namoyish etdi. Tailandning Osiyo kubogidagi, shuningdek Xorvatiya va Kubaga qarshi o'yinlarini o'rganib chiqqandik. Ular Braziliyaga mag'lub bo'lishdi, ammo "pentakampeon"larga qarshi o'yinda Tailand o'zining to'liq salohiyatini namoyish eta olmagani aniq. Biz aqlli o'ynadik. Bugun g'alabaga loyiq edik deb o'ylayman. Butun jamoa ajoyib o'yin namoyish etdi, ayniqsa darvozabonimiz.

CHorak finaldagi raqibimiz Paragvay terma jamoasining bir nechta futzalchilari Evropa klublarida faoliyat olib borishadi. Klubdagi faoliyatimda paragvaylik futzalchilar bilan to'qnash kelganman. Keyingi uchrashuvimiz ham juda qiziqarli va tomoshabop bo'lishi aniq. Ikki jamoa ham faqatgina g'alaba uchun maydonga chiqadi. Biz yarim final yo'llanmasini qo'lga kiritishimizga ishonaman.

Franciya o'z tarixida birinchi marotaba Jahon chempionatida ishtirok etmoqda, shu sababli har to'rt yilda mundialda qatnashadigan boshqa jamoalarni hurmat qilishimiz kerak. Bizda qo'rquv yo'q. Har bir jamoaga qarshi o'ynasa bo'ladi. CHorak final ham yomon natija emas, agar yanada uzoqroqqa bora olsak bu biz uchun bonus bo'ladi" - deydi bugungi uchrashuvning eng yaxshi o'yinchisi Abdesammad Muhammad.

Abdulvosit Bektemirov suhbatlashdi

Franciya Tailandni mag'lub etdi. Jahon chempionatida osiyolik jamoalar qolmadi