Биз ушбу интервюни ўзбек тилига таржима қилдик.
Каннаваро устимиздаги босимни олиб ташламоқда. У бизга бу кунлардан завқланишимиз кераклигини айтяпти
— Ҳаётингиздаги биринчи жаҳон чемпионати старти билан табриклайман. Ҳозир қалбингизда нималар кечмоқда?
— Жуда хурсандман ва ҳаяжонланаман. Болалигимдан буни орзу қилардим — ва мана энди дебютга бир қадам қолди. Мен эслайдиган биринчи жаҳон чемпионати — Жанубий Африка-2010. Эътиборлиси, ўшанда очилиш ўйинини — ҳозиргидек Мексика ва Жанубий Африка ўртасидаги баҳсни — бизнинг ўзбекистонлик ҳакам Равшан Ирматов бошқарган эди. Ўшанда олти ёшда эдим. Дадам билан буни томоша қилганимиз ва бизнинг инсонимиз шундай катта байрамнинг бир қисми эканлигидан хурсанд бўлганимиз ёдимда. Ўша пайтдан бошлаб жаҳон чемпионатига чиқишни ва у ерда ўйнашни орзу қила бошлаганман.
— Ирматов ҳозир Ўзбекистон футболининг асосий раҳбарларидан бири. У ўзи ишлаган жаҳон чемпионатлари ҳақида бирор нарса сўзлаб бердими?
— Жаҳон чемпионати — бу биз кўрган нарсаларга қараганда бутунлай бошқача ҳиссиётлар даражаси эканлигини айтди. У ерга етиб бориш осон эмас, лекин терма жамоамиз буни уддалади ва бутун халқимизнинг орзусини амалга оширди. Тарихимизда илк бор финал босқичига йўл олдик ва айнан бизнинг авлод бунга эришганидан фахрланамиз.
— Бош мураббий Фабио Каннаваро сизни тинчлантиряптими? Ахир у Италия терма жамоаси билан Германияда бўлиб ўтган ЖЧ-2006 турнирида ғолиб чиққан ва ҳатто ЖЧнинг энг яхши футболчиси деб топилган. Шундай экан, ҳеч бўлмаганда шу сабабли ҳам унинг сўзлари сиз учун катта вазнга эга бўлиши керак.
— Албатта, у биз билан ўз тажрибасини баҳам кўрмоқда. Ва устимиздаги босимни олиб ташлаяпти. Босимни ўз бўйнига олиб, бизга биринчи навбатда бу кунлардан завқланишимиз кераклигини айтмоқда, чунки биз ўз ҳаётимиздаги илк жаҳон чемпионатига келдик. Ва шунчаки футбол ўйнашимиз керак, чунки йўқотадиган нарсамиз йўқ. Балки бу бизга озгина устунлик ҳам берар. Энг асосий мотивация — халқимиз терма жамоа билан фахрланишидир.
Тўғри, биз энг қийин гуруҳлардан бирига тушдик. Ва қайсидир маънода Колумбия ва Португалия каби терма жамоаларга қарши ўйнашимиз яхши ҳам. Аммо ДР Конгони улардан кучсизроқ демаган бўлардим, чунки африкалик жамоалар жисмонан жуда бақувват ва ҳар қандай рақибга жиддий қаршилик кўрсата олишади. Менимча, барча ўйинлар жуда қийин бўлади. Фақат Ўзбекистон учун эмас, улар учун ҳам, чунки улар ҳали бизни билишмайди ва биз уларга сюрприз тақдим этишимиз мумкин.
— 8 июнь куни Нидерландия билан ўтказилган сўнгги назорат ўйинида жамоангиз сўнгги дақиқагача мардонавор курашди, деярли дуранг қайд этилиши мумкин эди — ҳисоб 1:1 бўлиб турганда Гакпо саккизинчи қўшиб берилган дақиқада пенальтидан ғалаба голини урди. Бу Колумбия ва Португалия даражасидаги рақибларга муносиб қаршилик кўрсата олишингизга қўшимча ишонч бағишлайдими?
— Ҳа, нидерландияликлар билан ўйинда ўзимизни синаб кўрдик ва жуда юқори даражадаги футболчилар — де Йонг, ван Дейкларга қаршилик кўрсата олишимизни ҳис қилдик. Ҳа, ишонч янада ортди. Курашга тайёрмиз ва лол қолдиришга қодирмиз деб ўйлаймиз.
— ЖЧ-2026нинг биринчи ўйини баланд тоғли ҳудудда бўлиши билан боғлиқ махсус тайёргарлик кўрдингизми? Ахир Мехико денгиз сатҳидан икки минг метрдан ортиқ баландликда жойлашган.
— Йўқ. Умуман олганда, агар у ерга тўғри ўйин куни учиб борилса, бу икки-уч кун олдин боришдан кўра яхшироқ эканлигини эшитгандим. Чунки тўлиқ мослашиш учун барибир икки-уч ҳафта керак бўлади. Кейинги иккита учрашувимиз эса бошқа баландликда ўтади. Шунинг учун у ерга ўйинга имкон қадар яқин вақтда етиб борган маъқул.
— Умуман олганда, жаҳон чемпионати олдидан йиғинлар оғир ўтдими?
— Жуда ҳам! Агар бизнинг барча йигитлардан сўрасангиз, улар: "Энг оғир йиғинлар бўлди", дейишади. Ҳатто 25 май куни, бу ерга учиб келишдан олдин, машғулот икки ярим соат давом этди. Биз битта машғулот давомида тўққиз километрдан югурдик. Бу жуда, жуда кўп. Клубда мавсум давомида битта машғулотда уч ярим — тўрт километр югурардик. Бу ерда эса — икки баробардан ҳам кўпроқ!
— Сизнингча, Португалия ҳозир Роналду билан кучлироқми ёки у сизми?
— Балки прессингда — у сиз кучлироқдир. Аммо Криштиану майдонда бўлганида, бу жамоага ишонч бағишлайди. Роналду исталган дақиқада ўйин тақдирини ҳал қилиб қўйиши мумкин. У футбол тарихидаги энг яхши ўйинчилардан бири ва унинг ҳали ҳам майдонда ниманидир ҳал қилишга қодир эканлигига ҳеч қандай шубҳа йўқ.
— Унга қарши майдонга тушадиган лаҳзани интиқлик билан кутяпсизми?
— Жуда-жуда интиқлик билан кутяпман, албатта. Телевизорда унинг ўйинларини кўрганимда доим шуни орзу қилардим. Ўзим Мессининг мухлиси бўлсам-да, Криштиану ҳам менга жуда ёқади. Унга қарши ўйнаш — албатта, бу бир армонли орзу.
— Роналду, ёдимда, Жалолиддин Машарипов билан бирга "Ал Наcср"да ўйнаб юрган вақтларида ўзбек халқига видеосалом ҳам йўллаган эди.
— Ҳа-ҳа-ҳа. Бу ижтимоий тармоқларда жуда оммалашиб кетганди. Акамиз у билан бирга ўйнади, кўп нарсани ўрганди, Криштиану эса у билан айрим дақиқаларни баҳам кўрарди. Машғулот якунида улар зарба бериш бўйича мусобақалашишарди.
— Хўш, ким ютганди?
— Буни айтиб бермайман, ҳа-ҳа!
Ҳусановнинг тақдири — юртимиздаги барча футболчилар учун мотивация
— ЦСКАдан кетганингиздан кейин Туркиянинг "Истанбул Башакшеҳир" клубидаги мавсумингиз ҳақида гапириб берсангиз. У ерга ўтишингиз қандай юз берди ва жароҳатлар туфайли икки бор узоқ муддатга сафдан чиққанингизни ҳисобга олсак, бундан афсусланмайсизми?
— Ҳеч нарсадан афсусланмайман, нимаики бўлса — яхшиликка. Ўтиш жараёнининг ўзи жуда қийин бўлди. Бошида клуб мени рўйхатдан ўтказа олмади ва мен тахминан уч ҳафта вақт йўқотдим. Жамоа билан машғулот ўтказа олмасдим, ўзим алоҳида ишладим.
Бу эса менинг жисмоний ҳолатимга таъсир қилди, менимча, жароҳатлар ҳам шу сабабдан бошланди. Бунгача фаолиятимда бирор марта ҳам жароҳат олмагандим, ўйинларни ўтказиб юбормагандим. Бу ерда эса озгина вақт йўқотдим ва шу сабабли спорт формам юқори даражада бўлмади. Лекин кейин кўникиб кетдим, ундан кейин жамоага янги мураббий келди.
— Нури Шаҳин, у бой футболчилик фаолиятига эга, ўтган мавсумдан олдин у Дортмунднинг "Боруссия"сини бошқарган эди.
— Ҳа. У менга ишона бошлади, мен эса унинг келиши билан ўзимни анча яхши ҳис қила бошладим. Умуман олганда, Туркиядаги биринчи мавсумимда ўзимни юз фоиз кўрсата олдим деб айтолмайман, лекин, такрорлайман, ҳеч нарсадан афсусланмайман. Чунки мен ўз орзум сари интиляпман.
— Истанбулда Ўзбекистон терма жамоаси сардори Элдор Шомуродов билан бирга ўйнаганингиз қанчалик ёрдам берди?
— Албатта, жамоада ватандошинг бўлса, бу чемпионатга ва бошқа мамлакатга кўникишга жуда катта ёрдам беради. Бунинг устига, биз дўстмиз, кўп гаплашамиз. У ерда уйларимиз ҳам жуда яқин, пиёда уч-тўрт дақиқалик йўл. Менимча, иккаламиз учун ҳам бир жамоага ўтганимиз жуда яхши бўлди. Мен трансфердан олдин Элдорнинг ҳам у ерда бўлиши мумкинлигини эшитгандим ва бу менинг у ерга боришимга асосий сабаблардан бири бўлганди.
— Яқинда сизнинг ЦСКАга қайтишингиз мумкинлиги ҳақида гап-сўзлар пайдо бўлди. Сизга ҳақиқатан ҳам қизиқиш билдиришяптими?
— Бу ҳақда билмайман. Ҳозир у ерга қайтиш нотўғри қарор бўларди, чунки мен ўз ривожланишимда янги қадам ташлаб бўлдим. Европанинг топ-5 лигаларига бормоқчиман ва агар бу ерда яхши футбол кўрсатсам, Худо хоҳласа, орзум ушалади.
— Жаҳон чемпионати жиддий "катта бозор" эканлигини ҳамма билади. Бу сиз учун ҳам мотивация бўляптими?
— Бу "катта бозор", бундай ўйинларни ҳамма томоша қилади. Аммо ҳозир бу ҳақда ўйлаётгани йўқ. Бор эътиборимни жаҳон чемпионатига қаратганман. Ҳозирги энг катта орзум — мана шу.
— Сизни энг кўп ўзига тортадиган лига борми?
— Испания. Доим у ерга боришни хоҳлаганман. Лекин кўрамиз.
— Ла Лигада севимли жамоангиз ҳам бордир?
— Албатта, "Барселона" — менинг энг катта орзум! Ва унга эришишга ҳаракат қиламан. Вақт кўрсатади, лекин охиригача ҳаракат қиламан.