Усмон Тошев: "Жамоа ўсишда давом этяпти"

Хабарингиз бор, 15 октябрь куни ЖЧ-2022 саралаш босқичининг иккинчи раунд 4-тур учрашувлари ўтказилди. Ўз майдонида Японияни қабул қилган Тожикистон терма жамоаси 0:3 ҳисобида мағлубиятга учради. Бу Тожикистоннинг саралашдаги биринчи мағлубияти бўлди. 

Ўйинда Такуми Минамино иккита гол урган бўлса, яна бир гол Такума Асано ҳисобига ёзилди. Тожикистон терма жамоаси бунга қадар Японияга қарши охирги марта 2011 йил баҳс олиб борган ва ўшанда 0:8 ҳисобида мағлубиятга учраганди. Гарчи навбатдаги мағлубият ҳам йирик кўриниш олган бўлса-да, бош мураббий Усмон Тошев жамоа ўсишда давом этаётганини билдирди. 

"Тайёргарлик бўйича кам вақтга эга бўлганимизни ҳисобга олиб бу мағлубиятни ваҳимали демаган бўлардим, - дейди Усмон Қудратович. - Футболчиларимиз кучли жамоага қарши бор куч билан ўйнашди. Афсуски, ҳар икки жамоанинг савияси барибир фарқ қилади. Натижадан хафамиз, лекин жамоа ўсишда давом этяпти деб бемалол айта оламан. Футболда пойдеворсиз жамоа қуриб бўлмайди. Қачонки кучли рақибларга қарши ўйнаб ўсишга эришамиз. Япония билан баҳс биз учун яхши сабоқ бўлди". 

Тожикистон миллий терма жамоаси ноябрь ойида Мьянма ва Қирғизистонга сафар қилади.